Shillong, Jan 18: Meghalaya a•doko Bird Flu (Avian influenza)-ko man•jana gita a•dokni Veterinary & Animal Husbandry, ia sabisi giproroenggipa a•dokrang jekai, Bihar, Jharkhand aro West Bengal a•dokrangko name nirikkienga ine sorkari official-rang parakatenba, mikkangchiba ia sabisiko a•doko champengsona gita gipin a•dokrangoniko do•o aro do•bitchi ra•baaniko champengangkugen ine talatangaha.

“India a•songni gipin bakrango ‘Bird Flu’ dongjaha ine parakkujaskal chinga Meghalaya a•dokona do•o aro do•bitchi ra•baaniko champengangkugen. Meghalaya a•dokona ra•napbaenggipa do•o mangprakprakko porikka ra•e nisona chingo cholrang dongja, uni gimin da•o dipet a•songni gipin biaprangoniko do•o aro do•bitchi ra•napbaaniko champengsoana agrede chingko gipin cholrang dongjaenga,” ine Veterinary & Animal Husbandry department-ni Principal Secretary GHP Raju, Hub News-na aganaha.
Do•orango giproroenggipa ia sabisina maming sanna banani cholrang aro tikarang dongjani gimin ia sabisini giproroaniko champengsoana agrede department-o gipin cholrang dongjaenga ineba Raju talataniko on•angaha.

Indake ong•genchimoba Principal Secretary-ni parakatani gitade, Assam, Nagaland, Manipur, Tripura aro Mizoram a•dokrangoniko Meghalaya a•dokona do•o aro do•bitchi ra•baanikode sorkari champengjaenga.

Gipin biaprangoniko do•o aro do•bitchi ra•baaniko champengatahani a•sel Meghalaya a•doko do•o aro do•bitchirangni dam bang•gija tang•doaha ineba Raju parakataha.