29.8 C
Tura
spot_img

Niam donede darangba BJP dolo napjachina ine Hek agana

Must read

Shillong, Jan 18: Niam gnang re•baenggipa manderangkode Bharatiya Janata Party (BJP) dol nokchakna man•jawa ine Sombar salo, BJP dolni dilgipa aro Meghalaya-ni Cabinet Minister AL Hek parakataha.

BJP dolni ku•mikchetanirangko chu•sokatgenchimode aro Meghalaya a•doko nangenggipa Inner Line Permit (ILP) baksana dingtang dingtang neng•nikanirangko namatgenchimode BJP dolona re•bagen ine adita salrangna skangsan Khun Hynniewtrep National Awakening Movement (KHNAM)-ni MLA Adelbert Nongrum aganahachim.

Indake ong•engon, BJP dolona re•baenggipa darang mandean maming niam gri re•bagenchimosa BJP-o nokchakna man•gen ine Hek parakatskaaha.

“BJP dolona anga jekoba rimchaksona kusi ong•aigen indiba niam gnangde BJP-ona re•bajachina,” ine ua aganaha.

BJP dolona Adelbert baksana jekoba rimchaksona kusi ong•aigen ine janapatengon, “Knalo uamang angna iako on•bo unode anga BJP napgen ba angna iako on•bo unode angaba BJP-o napgen ine aganna man•a indiba iandakede cholijawa. BJP-ona re•baengon maming niam dongna gita nangjawa,” ine Hek aganaha.

“Manipur a•dokna ILP-ko on•na man•a ong•ode maini gimin Meghalaya a•dokna man•jawa? Manderangni dabianirangko aro nanganirangko BJP chu•sokate on•na nanga,” ine BJP-ni dilgipa aro Union Home Minister Amit Shah-ni Shillong-ona re•bana antisa skangba Nongrum aganahachim.

spot_img

More articles

spot_img
-->

Latest article