Shillong, Nov 29: Budbar salo, Meghalaya sorkarini official-rang, dingtang dingtang petroleum marketing company-rang aro petrol pump nokgiparang baksa Ri Bhoi a•jani Nongpoh Circuit House-o tom•e chanchirimangani ja•man, Meghalaya a•dokona aro mongsongbate Khasi-Jaintia Hills a•jarangona petrol, diesel aro uandakgipa bosturangko salbaaniko dontongna manchianiko ra•galpilna gita North East Petroleum Mazdoor Union (NEPMU) tik ka•angaha.

NEPMU aro dingtang dingtang petrol company-rang baksa tom•e chanchirimani ja•man kobor ra•timgiparangna talate on•angengon, ia tom•anio dongpae bak ra•gipa pilakan sorkari baksa bakrimaniko on•na ku•rachaktokahani gimin Food Civil Supplies & Consumer Affairs department-ni Commissioner & Secretary Pravin Bakshi, an•tangni kusi ong•aniko parakataha.

NEPMU-ni membor-rangna sorkari, hajirarangko, Employees Provident Fund (EPF)-ko aro pilak nanga dakchakanirangko on•na ku•rachakaha ineba Bakshi aganaha.

A•dokona to aro gas-rangko salbaenggipa driver-rangni kosako Meghalaya police-rang, sinjetanirangko on•na jotton ka•enga ine matnangenggipani bidingo janapatengon, a•dokona manderangni nangchongmotgipa bosturangko salbaenggipa gari aro manderangni kosako skatang bilrangko jakkaljachina gita Bakshi, Police department-ko didiataha.

Indake ong•engon, Meghalaya a•dokona to salbaaniko dontongna gita uamang maming champengatanirangko daka dongkujachim aro ia pilakan ma•sisretgrikani a•selsa ong•aha ine NEPMU-ni dilgipa talataniko on•angskaaha.

Iani bidingo uamang Guwahati-o union-ni gipin dilgiparang baksa tom•e chanchirimangkugen ineba ua parakataha.

Meghalaya a•dokona petrol, diesel, LPG aro uandakgipa bosturangko salbakuaigen ineba ua a•dokni manderangko kenjagokjachina gita didiataha.

Iakoba poraie nina man·gen: SAI-o ong•atenggipa National Boxing Championship-ko CM niea