Shillong, Feb 6: Mija bilsi December jani 28 tariko Catholic ma·malni Rongtalgipa Pope Francis-ni jakchi Shillong Archdiocese-o dangdike on·na gita Archbishop-na minge seokangako man·gipa Most Rev. Victor Lyngdoh-ko da·al Sonibar salo Shillong Archdiocese-ni Archbishop ong·e jinmani mikkango songangaha.
Uko da·al salni bako Shillong-ni Mary Help of Christian Cathedral giljao tom·aniko ong·ate songanganio, salgro-salaram a·dokrangni Archbishop-rang, bishop-rangko man·chape gipin dal·dalgipa dilgiparang gimikan dongpatokaha. A·dokni skotong minister Pa Conrad K. Sangma, Power Minister Pa James K. Sangma, Health Minister Pa A. L Hek, Home Minister Pa Lahkmen Rymbui aroba assembly-ni gipin memborrangba salni tom·anio dongpae bakko ra·angtokaha.
Meghalaya, East Khasi Hills District, Wahlang songo 1956 bilsini January 14 tariko atchigipa Bishop Victor Lyngdoh, St. Gabriel’s Higher Secondary School-o a·gilsakni seng·aniko skie ra·miting somoio Shillong, St. Paul’s Seminary-o napeaha. Uni ja·mano Shillong, Christ King College-o Philosophy-ko dakskae uni joljol Mawsynram-ni St. Francis Xavier Church-o dangdike on·achi somoiko re·ataha. Uni ja·man ua, Mawlai, Sacred Heart Theological College-o napeaha. Uko, batanggimin 1987 bilsini January 25 tariko giljani kamal ong·e dangdike on·china seokangaha.
Shillong-ni Archdiocese-oniko gital bikotgipa Nongstoin diocese-ni skanggipa Bishop ong·e dangdike on·chinaba uko batanggimin 2006 bilsini April 2 tariko seokaha, indake ua bilsi chikkingna kingking Nongstoin diocese-o dangdike on·angaha. Uni ja·man, Pope Francis uko Jowai-ni diocese-ona 2016 bilsini October 15 tariko jitataha indake uko 2016 bilsini November 20 tariko Bishop-na songangaha.
Uko songao bakko ra·e skotong minister Pa Conrad Sangma-ni jinmana aganprakanio, Pagipa Isol da·alo an·chingni giljako re·dilna gita Archbishop Victor-ko una dangdike on·china gita minge seokahani gimin Catholic giljanasan ong·aija indiba Meghalaya a·doknaba namen rasong chabeani sal ong·a ine aganaha.
Archbishop baksa uni bak dongpaaniko gisik ra·atpile agananio, “Angni pagipa sagi P.A Sangma baksa Archbishop Victor-ko mikkang-para grongna gita cholko man·aha. Bang·a manderangan ma·sienggen, angni pagipako Catholic missionary-rangsa dal·at chuataha aro pangnan Pagipa Isolna kene janggi tangchina skianiko chinga man·baaha. Rongtale janggi tangani, mande ong·ani, ka·saani aro sakgipinrangna ka·sachakaniko chingo gapatachi Catholic gilja chingna bang·akon dakaha ineba ua agandapaha.
