Tura, March 23: Meghalaya State Food Commission (MSFC)-ni Chairman, Pa PS Thangkhiew, Garo Hills-o donggipa dingtang dingtang Supply-ni Deputy Commissioner-rang aro District Grievances Redressal Officer (DGRO)-rang baksa batanggimin kamrangni bidingo nipiltaianiko dakna gita Tura Circuit House-o Sombar attamo review meeting-ko ong·atangaha.
Tom·anio, commision-ni kamrang tang·dobatengma ma apsano dongaienga uko aro Grievances aro Vigilance Committee-rang a·jatangtango mai kamrangko ka·enga iarang gimikko nipiltaina gita tom·aniko ong·ate, commission-ko songe nangchongmotgipa kamrangko nipiltaie ka·angna, chong·motan Mid Day Meal aro gipin district-rango ICDS-ni gita Nutritional Program-rangko ra·gate nirok-simsakaniko on·angna miksongani bidingo MSFC-ni chairman unsalo memborrang baksa agan-chanchigrikangaha.
MSFC-ni miksonganian, mikkangchi dingtang dingtang district-rango National Food Security Act (NFSA)-ko nambate chalaiangna gita block ge·antio Social Audit-rangko done Fair Price Shop-rangna automation aro computerisation-ko jakkale ration card-rangni gita cha·anirangko jaanti suale on·anian mongsonggipa ong·a, jedakode Fair Price Shop-rang an·tangtangni hisapko name rakkina man·gen ine MSFC-ni Member Secretary Ma Sabrella Marak agandapangaha.
Ia nangchongmotgipa tom·anio Garo Hills a·jani dingtang dingtang Deputy Commissioner-rang aro official-rangba bakko ra·angaha.
