Shillong, Jan 15: MUDA department-ni nirokatani ning·o batanggimin sorkarini building by-laws ba nok rikna niamrangko ra·gatani bidingo u·iatanirangko ra·galpilani gimin an·ching pilakan Pa Hamletson Dohling-na gro nanggiparang ong·chongmota ine ua niamrangchi neng·nikaniko man·pagipa Mawryngkneng-ni MLA, Pa Pynïaid Sing Syiem mija Sonibar salo aganangaha.
Pa Pyniaid Sing Syiem-ni janapatani gita, skangni sorkarini ra·gate donanggipa building by-laws ba chona ba dal·a nokrangko rikna gita MUDA department-ni bil on·aniko ra·chengna nangani gimin niamko ra·gatanichi, Mylliem constituency-o, New Shillong-ni Umpling, Nongrah, Mawlynrei, Ishirwat oni Mawpdang aro Sohryngkham-rango chagronggipa neng·nikanirang gitan Mawryngkneng-oba apsan obostako chagrongna gita nangahachim.
“Bah Hamlet-ni MLA ong·e, Urban Affairs Department-ni minister-na seokako man·ani ja·manosa a·dok sorkari baksa apsan kamrangko ka·e uni dakdilanichi skangni Congress sorkarini ra·gate donanggipa niamko ra·galpilna gita man·aha ineba Pa Pyniaid Sing Syiem aganangkuaha.
Batanggimin 2015 bilsini August jao, unomiting skotong minister ong·enggipa Dr Mukul Sangma, master plan a·jani ning·ogipa Meghalaya a·dokni mongsonggipa jillarango jeon mongsongbate rika-cho·anirangko dakenggipa biapo Building By-laws-ko ra·gate donangahachim ine nikatna man·gen.
Ua niam ra·gataniko parakatanichi, songsalni dingtang dingtang dolrang jekai NGO-rang, politician-rang, aro ramram manderang ua niamko ra·chakna man·gijaniko aro suk ong·gijaniko mesokna aro Congress sorkarini kosako jegalna gita ramarangona ong·kate jingjengatanirangkoba ong·atahachim.
Uandake, 2018 bilsio eleksin ong·ani ja·man NPP-chi rikdilgipa MDA sorkarini bil-sasonko jako ra·chakatahaon songsalo janggi tanggipa dingtang dingtang dolrangni ra·chakna amgijagipa MUDA building by-laws-ni mamlako chanchirime manderangni chagrongenggipa neng·nikanirangko komiatna gita a·dokni skotong minister Pa Conrad K Sangma baksa aganchanchigrikaniko dakangaha.
