Shillong, Nov 25: Re•anggipa November-ni 22 tarik pringo ong•gipa a•selni bidingo ma•sie ra•na gita Bristibar salo, Meghalaya a•dokni Director General of Police (DGP) Dr LR Bishnoi, Jaintia Hills a•jani Mukroh songona re•angaha.
Ia songona re•ange ua songni manderang baksa agangrikon, songni manderang an•tangtangni mi a•palrangona re•anga changantian Assam-ni forest guard-rang songni manderangko dokkol ka•e rona jotton ka•rongachim ine songni mande saksa DGP-na parakataha.
Mukroh songoni kilometre 10-mang chel•ao donggipa Mokoilum song, jean Assam-Meghalaya simao donggipa song ong•achim, ia songo songdongenggipa manderangni DGP-na parakatani gitade, uamang an•tangtangni game ge•e man•gipa mi misirangko salna nangoba pangnan Assam-ni forest guard-rangna kajinarangko gamna nangrongachim.
Ia jolrango songdongenggipa manderang skangonin iandake Assam-ni police aro forest guard-rangna kenchipchipe janggi tangna nangtokrongachim aro adita salrangna skang, Mukroh songo ong•anggipa a•selni ja•mande uamang, songni bijangchionasa re•ange dongna gita nangtokenga ineba songni mande saksa, Dr Bishnoi-na aganaha.
Iani bidingo skangonin uamang, dakchakanirangko on•china gita dilgiparangko aro sorkariko didiahachim indiba da•onan maming dakchakanirangko man•chipja ineba songni manderang parakataha.
Koborko on•ani gitade, Mukroh aro Mokoilum songrango mi misirangko game ge•e cha•anian manderangni mongsonggipa janggi tangani chol ong•achim aro songni manderang salantian an•tangtangni mi a•palrangona chel•begipa ramarangko re•na nangrongachim.
Manderangni iandakgipa neng•nikanirangko knae ra•ani ja•man Grievances Report-ko tarichina gita a•dokni DGP Dr Bishnoi, West Jaintia Hills a•jani SP Bikram D Marak-na ge•etaniko on•angaha.
Ia report-ko ua Assam-ni DGP-na on•atskagen ineba Dr Bishnoi parakataha.
