Shillong, July 13: Re•baenggipa 2023 bilsini Assembly election-o All India Trinamool Congress (AITC)-ko cheate sorkariko rikna chol on•genchimode, Assam aro Meghalaya a•dokni gisepo soi ka•grikgipa Memorandum of Understanding (MoU)-ko den•galpilgen ine Opposition AITC-ni dilgipa Dr Mukul Sangma-ni agananiko Budbar salo, Meghalaya a•dokni Chief Minister aro National People’s Party (NPP)-ni national president Conrad K Sangma jegalatenba, da•o election sepangengahani giminsa ua manderangko salna iandakgipa kattarangko aganenga ine parakataha.
Chief Minister-ni parakatani gitade, bilsichetna skang Congress dolni dilanichi uamangni sorkariko chalaiengmiting somoio, Assam aro Meghalaya a•dokni simarango ong•enggipa obostarangko namatna gita maming ja•kurangko de•jahachim aro da•o NPP-chi dilenggipa MDA sorkarini maikoba chu•sokatahaon, iako uamang ra•gale galpilnasa jotton ka•skaengachim.
A•dok damgnini simarango ong•enggipa obostara namen ning•tugipa obostasa ong•a aro ia kamko sorkari namatna kam ka•engon Opposition dolba sorkari baksa bakrimanikosa on•na nanga ineba Chief Minister aganaha.
A•dok damgnini simarango meligrikgijanirangko namatna kam ka•engon, name wa•reng salchengesa aro survey-rangko dakchengesa ka•na nangachim ine Mukul Sangma-ni agangipa kattarangko jegalatengon, ia map aro survey-rangko uamangni sorkariko chalaiengmiting somoirangon tariahachim ine Chief Minister talataniko on•angskaaha.
Ia report-rangko tariani somoirangode MDA sorkari dongkujachim ine talataniko on•angengon, opposition dolko dilgipani iandake matnanganiara an•tangni kosako matnangani gitasa ong•engaha ine Conrad Sangma parakataha.
Ia kamrangni gimin sorkariko matnange roaigija manderangni namgnina dingtang dingtang kamrangni gimin kattarangko bikotskachina gitaba Sangma, opposition dolni dilgiparangko didiataha.
