Guwahati, Oct 11: BSF sipairang baksana Assam Police nangrime, pekatgipa samrangko niam gri badingsrukenggiparangni kosako sandirokataniko dakatenba, Assam-ni salgipengchipakgipa Karimganj-oniko kg 9.477 mang ong·pilgipa aro gong kror 47.4 mangni gita gamchatgipa Heroin drug ba pekgipa samrangko Mongolbar salo sekaha aro ia mamlao saksako rim·aha ine ja·pangoni u·iataha.
Border Security Force-ni agantimgipani u·iatani gita, BSF sipairang aro Karimganj police dolgni nangrime sandiatanio Mizoram-chipakni re·baenggipa Tripura a·dokni trak bolsako New Karimganj Railway Station sambani rama tong·sao dongdipate sandirikkitaton pekgipa bosturangko chipe ra·baenggipa sabon case ge 764 ko man·aha.
Sekgimin bostuko aro rim·a man·gipa trak salgipako da·o niam gita sing·sandiataniko dakangna gita Karimganj police-ni jako on·aha.
BSF official-rangni chanchichipani gitade, ua pekatgipa samrangko songsul a·song Myanmar-chiniko badingsrukatenga.
Iana salbri skangsan, ma·mongni home minsiter Pa Amit Shah, ‘Drug Trafficking and National Security’ ni bidingo Guwahati songjinmao salgro-salaramni pilak skotong minister-rang, Chief Secretary-rang aro Director General of Police-rang baksa tom·e golpoangahachim ine nikna man·a.
Pekgipa samrangko badingsrukatanirangko champengna namen rakgipa kam ong·a jenan drug law enforcement, intelligence agency-rang aro salgro-salaramni sima-ari jolrango donggipa district-rang gimik nangrime kamko ka·achisa champengna man·gen ine Guwahati-o tom·ao golpoangaha.
Batanggimin 2014 bilsioni intal, salgro-salaram a·dokrangoniko gong kror 20,000 mangni gamchata drug-rangko sekaha aro drug badingsrukgipa sak 4,888 mangko rim·aha ine tom·anio u·iatangaha.
Mija Sonibar salosan, internet gita ma·mongni home minister-ni dongpaanio salgro-salaramni a·dok damsnioniko seke man·gipa pekgipa bosturangkoba so·dame galangaha.
Iani bidingo, Intelligence Bureau-ni Additional Director ong·e ru·uta bilsina dangdike on·anggipa aro Tripura-ni Director General of Police, Pa Amitabh Ranjan-ni aganangani gita, salgro-salaramona aro a·songni gipin bakrangona pekgipa bosturangko songsul a·song Myanmar-chiniko badingsrukatenganiara chelchakgipa dolrangna nirok-simsaksoanio namen ra·bianiba ong·a ine parakataha.
