Shillong, Nov 11: University of Science & Technology Meghalaya (USTM)-na National Assessment & Accreditation Council (NAAC)-ni Grade ‘A’ award-ko on•ahani gimin Bristibar salo, Meghalaya a•dokni Chief Minister Conrad K Sangma, ia university-ona re•angenba USTM-ni skigiparangna aro chatro chatrirangna, an•tangni namgipa skaniko parakeaha.
Ia apsan somoion ua USTM-o gital rikgipa Mahatma Gandhi-ni statue-koba oprake on•angjolaha.
Ia program-ko ong•atanio India sorkarini Space Department-ni ning•o donggipa NESAC-ni Director Dr SP Aggarwal, NEHU-ni Vice Chancellor Prof Prabha Kr Shukla aro gipinrangba dongpae bak ra•angaha.
Ia program-ko ong•atanio a•dokni Chief Minister, jinmana aganprakangengon, USTM-ko dilgiparangni rakbee aro ku•cholsan kamko ka•ahani a•selsa Grade ‘A’ award-ko man•aha aro uamangni on•kange kam ka•anichian ‘A++’-koba man•na siengaha ine parakangaha.
Ia chu•sokanina USTM-ni Chancellor Mahbubul Hoque-ko mittelpilangengon, uni ka•dongani gnang kamko ka•anichian ia university gital chasongna ka•dongani ong•enga aro ian a•songnaba ka•dongani ong•enga ine Sangma parakangaha.
Am•sandiani aro namroro silroroani kamrango USTM gita dakgipa institute-rangan mongsonggipa kamrangko ka•gipa ong•a ine janapatengon, iandakgipa university-rangan a•songko rikanio on•gilgiparang ong•a ine Chief Minister parakataha.
Ia salo a•dokni Chief Minister, USTM-o donggipa PA Sangma International Block-ni Central Instrumentation Centre-koba niangjolaha.
Iana skang, USTM-ni Chancellor Mahbubul Hoque, tom•bagiparangna rimchaksoani kattarangko aganangengon, 2030 bilsini gisepon ua USTM-ko a•gilsak gimiko niksenggipa university ong•atna rake kamko ka•enga ine parakangaha. USTM-ko kulichengaonin pilak nanga dakchakanirangko on•engani gimin ua Meghalaya sorkarikoba mittelpilangaha.
Ia tom•anio NEHU-ni Vice Chancellor Prof Prabha Kr Shukla-ba jinmana aganprakengon, salgro salaram a•dokrango songdongenggipa manderangni jumangko chu•sokatna gitasa USTM-ko Mahbubul Hoque a•bachengataha aro ian mikkangchi salgro salaram a•dokrango songdongenggipa manderangni ka•donganiba ong•gen ine aganangaha.
