Kohima, Oct 05: Gimik-gimang gong kror 29-rangni gita gamchatgipa kg 48.14 ong·pilgipa sona dot 290-mangko aro pekatgipa sam ba drug-rangko Nagaland police mija Sombar salo sekenba ia mamlarango saksku manderangko rim·aha.
Niam gri basingsrukatna miksongenggipa indita bang·bea sonarang baksana bang·a pekatgipa samrangko Nagaland police ian skanggipa chang ong·e sekrikna man·aha.
Iani bidingo koborna talatengon, ning·joljol koborrangko man·ani ja·man Nagaland police mija Sonibar, Robibar aro Sombar salrango dingtang dingtang sandiatanirangko dakate Nagaland-ni skotong songjinma Kohima-ni Khuzama-o donggipa narcotic check point-rango sonarang aro pekatgipa samrangko sekrikaha ine Nagaland-ni Additional Director General of Police (Administration) Pa Sandeep M. Tamgadge u·iataha.
ADGP-ni u·iatani gitade, mija Robibar salo Kohima-Imphal National Highway ramao gari bolsako rim·rikenba niam gri ra·baenggipa katom 29 sonarangko garini gear lever mitapo donnue ra·baako man·aha jeni jrimanian kg 48.14 mang ong·a aro gong kror 22.78 rangni gita gamchatachim. Ia mamlao Uttar Pradesh-oni saksa bilsi 35 ong·gipa Saurabh Singh aro sakgipin bilsi 45 ong·gipa Pawan Kumar-maang sakgniko rim·aha.
Unbaksana, mija Sonibar, Robibar aro Sombar salrango dingtang dingtang sandianiko dakanganioba ua apsan biapon gimik saksni manderangko rim·daptaiaha jemangonikon sabon bikop ge 88-ni ning·ao chipe ra·bagipa kg 1.84 mang ong·gipa Heroin drug-rangko aro kg 1 ong·gipa katom 12 opium drug-rangko man·aha jerangni gamchatanian gong kror 6.50 rangni gita ong·achim ineba ADGP agandapataha.
Indake ong·engon, Nagaland a·dokara songsul a·song Myanmar baksa international sima-ariko sualgrike dongengani gimino niam gri ong·gija dake badingsrukatani pilak kamrangan Nagaland-Myanmar rama gitan ong·batenga ine nikatna man·gen.
