Kolkata, May 2: West Bengal a•dokni Assembly election-ko ong•atanio West Bengal-ni Chief Minister Mamata Banerjee, Nandigram-o an•tangni gitcham dakchakgipa aro BJP-ni Suvendu Adhikari-ni jako 1737 vote-rangchi amako man•aha.
Da•o dipet Adhikari-ni cheaniko Election Commission paraksrangkujaengoba, Mamata Banerjee an•tangan an•tangni ama man•aniko ra•chakaha indiba iani kosako kachario ra•bitaikugen ine parakataha.
West Bengal election-o Trinamool Congress (TMC) ge 213 seat-rangko cheaha aro BJP dol ge 77 seat-rangkosan cherikskaaiaha aro uandaken ia changoba Mamata Banerjee, an•tangni bilko rakkipiltaina man•aha.
Nandigram-o cheaniko cha•bokesa cheaha ine janapatengon, “Cheaniko Election Commission parakatani ja•man da•o dingtangkosa aganskaengaha. Chinga iani bidingo kachariona re•ange dakgrikkugen. Nandigram-ni manderang jeko namnike seokaha uko angaba ra•chakna kusi ong•aia indiba ia election-o chinga bang•bea seat-rangko chena man•ahani gimin anga kusi ong•aia,” ine Mamata parakataha.
2011 bilsio Suvendu Adhikari-sa Mamata Banerjee-ko CM ong•atna dakchakahachim ine nikna man•a.
