Agartala, May 22: Napsrukbagiparang aro a·palchini manderangsa Tripura a·doko bil-sasonko jako ra·enggipa BJP dolko ong·siatenga ine a·dokni skotong minister gitcham Pa Biplab Kumar Deb, Robibar salo a·kangangaha.

Uni da·o dongenggipa noko kobor ra·timgiparangna aganangengon, iani bidingo ma·mongni dilgiparangnaba ua u·iataha aro Prime Minister Pa Narendra Modi aro Home minister Pa Amit Shah-maangni re·dilaniosa dolko chalaina gita nanga aro BJP-ara bewal aro cholonoba namgipa dolsa ong·a ine Pa Biplab Kumar parakataha.

Indake ong·engon, adita sak a·palchini manderangsa nappabrokenba BJP dolni ning·o ong·enggipa mamlarango jak on·pae dolko ong·siatenga ine Pa Deb darangkoba biming pe·gija matnange aganangan baksa, a·palchini inani ortokode na·songba ma·sia aro party organisation maini gimin golmal ong·enga uko darangan u·ia aro iani gimin aganna gita anga saksa dal·gipa mande ong·.ja aro officer-ba ong·ja indiba, iandaka nambata chol ba biapko ra.e aganna ian angni daito ong·skaa ineba skotong minister gitcham agandapataha.

“BJP sorkarian gnigipa changna Tripura-o bil-sasonko jako ra·piltaienga aro Communist dolni sason ka·gnioniko a·dokko jakgitel ong·ataha, aro an·tangba angni bil ama kakketde a·dokni manderangna dake-ka·e on·na gita jotton ka·aha ine Pa Deb aganangkuaha.

Pa Biplap Deb, ma·mong BJP-ni dildiparangni ge·etaniko man·enba re·anggipa bilsini May 14 tarikon Tripura-ni skotong ministerni kamko watahachim ine nikatna gita man·gen.