Guwahati, Nov 30: Assam-ni songadam jolrango donggipa chatro chatrirangna a•dokni a•palona skanggipa changna songreange nianiara uamangna namen gualna man•gijagipa cha•tote niani ong•aha.

Indian Army-ni Spear Corps dolni gita, ia gualna man•gijagipa National Integration Tour ba songreani cholko on•aniara, Assam a•doko donggipa chatro chatrirangna jumango nikaikugipa biap ba dake nianirangko bimang pilatna dakchakaha.

Ia tour-ni gita chatro chatrirang, Delhi, Mumbai aro Ahmedabad-ona re•angenba namen mingsingbegipa biaprangona re•ange dingtang dingtang jatni dakbewal rikbewalrang, itihas-o mingsinggipa biaprang aro sipai dolrangni mongsonggipa biaprangko nikangna gita man•aha. Tinsukia-ni class XI-o poraienggipa chadambe saksa Beatrica Sonowal, ia songreaniara una jumangko bimang ong•ata chacha gita ong•aha ine aganengon, ua maming saloba iandakgipa mingsinggipa biaprangko nikna aro didianiko ra•bana man•gipa manderangko grongna man•gen ine ka•donga dongjachim inenba aganangaha.

India a•songni President Draupadi Murmu-ko grongna man•aniara una janggi tanganio dingtanganiko ra•bana gita chol ong•aha ine aganengon, President uamangko jumang dal•ako nikchina gita didianikoba on•angaha jean uni ka•tongo pangnan dongkamgen inenba, songreanggiparangoni saksa chadambe Sauhan Ali aganangaha.

Songreanggipa chatro chatrirang, National War Memorial-ona re•ange sianggipa sipairangko mande ra•aniko dakangan baksana Delhi-ni Qutub Minar aro Dilli Haat jatrangni dakbewal rikbewalrangko nie an•saoanirangko man•aha.

Ia tour-ni gita chatro chatrirang dingtang dingtang jatrang baksa meli nangrimna gita cholko man•aha. Upper Assam-o donggipa dingtang dingtang jatni chatro chatrirang baksa uamang meligrikna aro u•igrikna gita cholrangko man•an baksana ku•cholsan meli nangrimani nitoanikoba cha•tote nina gita cholkoba man•aha inenba, Tinsukia-ni Manobi Baruah aganangskaaha.

Na·simang ia video-koba nina man·gen: 

Na·simang iakoba poraina man·gen: Manipur-ni Kakching police station-ko chadrapanina sak 7 manderangko rim•a

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub