Shillong, April 18: Chang 83 gipa National Table Tennis Championshipko sombar saloni Shillong songjinmani NEHU campus-o donggipa Sports authority of Indiani Indoor Training Centreo a•bachengatnasienga. Ia kal•susaanio India a•songni tennis kal•anio mingsinggipaanderang jekai, Manika Batra, Sathyan Gnanasekaran, Sutirtha Mukherjee aro Achanta Sharath Kamal iamang bak ra•angna sienga. India a•song gimikni sak 450 kal•susagiparang aro sak 200 skie on•enggiparang bak ra•anggen. Mnisalo Manika Batra, Orisa, Jammu Kashmir, Sikkim, Telengana, Goa UPni kal•susagiparang Shillong songjinmaona sokbaaha. Uamangna dongchakani aro securityrangko Meghalaya sorkari niroke dakchakanirangko on•anggen.
Shillong songjinmao iana skangba, South Asian Federation Junior Table Tennis Championshipko 2012 bilsio aro South Asian Games ko 2016 bilsioba sokachakahachim.
Indake ong•engon mingsa dukni katta, ia kal•susaanio bak ra•na Tamil Naduoni re•bagipa bilsi 18 ni D.Vishwa minggipa jean table tennis kal•na changbegipa ong•achim, Ribhoi a•jani Shangbangla minggipa biapo truck gari baksa chagakgrike a•sel ong•aha. Ia a•sel ong•anio D.Vishwa aro uko salbaenggipa driver Dipal Das bilongbee mata-bu•ako man•e janggi tangtangko gimaatna nangaha.Koborna aganani gitade Truck gariko salenggipa agre ta•rakdugae salani a•selosa indake ong•na nangaha.
A•sel ong•ao sianggiparangko Nongpoh Civil hospitalona ra•ange ja•mano NEIGHRIMS-ona watatahachim indiba rasong gribee uamangko sansrapgijaan a•gisakko watangna nangaha. Ia a•sel ong•aniko policerang register ka•aha ine u•iataha.
