Williamnagar, September 12: Bilsianti September 5 tariko Skigiparangni sal ba Teachers’ Day-ko maniani salo a·songgimikoni nambatgipa skigiparangko seoke mingnamgipa Uphadiko a·songni President-ni jakchi on·aniko dakronga. Ia bilsi 2022-o East Garo Hills Williamnagar-o donggipa Educere Higher Secondary School-ni skotong skigipa aro ua School-niba nokgipa Ma Gamchi Timre R Marak, National Teachers Award 2022-ko a·songni President Ma Droupadi Murmu-ni jakoniko ra·chakeaha.

National Teachers Award 2022-ko Delhi songjinmao ra·chake songtang noktangona re·bapilengon, September 12 tariko Educere Higher Secondary School-ni dakchakgipa mongsonggipa skigipa Pringchi N Marak, pilak schoolni chatro chatrirang, skigipaskarang aro schoolo kam ka·enggipa sakantiko ku·mongdile Ma Gamchi Timre R Marak-ko kusi ong·bee rimchaksoaniko dakdilangaha.