Shillong, July 6: North Eastern Hill University (NEHU) Shillong Campus-o, Sukrobar pringonin bijoli gri ong•aoni konta 32 mang gappilaha, jeni a•selan campus-ni chatro chatrirang aro staff-ni manderang neng•nikaniko chagrongna nangengahachim.
Una agreba campus-ni dingtang dingtang department-rang, jekai, laboratory, hostel, pump nokrang aro building nokgimiko chu•gimikan bijoli gri ong•ahachim. Indake engineer-rang ia bijoliko sokatpilna jotton ka•beoba uamangba chu•sokna man•jaenga ine nikna man•a.
Ia campus-o bijoli dongjae chi saldoani pump-rangko jakkalna man•jani a•sel, mongsongbate chi man•jani gimin neng•nikaniko man•batenga. Indake ong•engon, chatro chatrirang aro staff-ni manderang, gipinrangchikosa chirangko jakkalsona gita nangengaha.
Ia campus-o 2500 KV-ni bijoli station gnangchim jekon, dam 15 sub-station-rangona salangenga aro ia bijolini station, University-ni engineer-rangni chalaienggipa ong•a.
Ia bijoli cable-rangko mongsongbate, NEHU-ni a•a ning•a gita salaha jean, kosakgilgil salgipa cable-rangna bate, mikka balwa, bolrang aro matburungrangni nosto ka•anina kenani dongbatjachim. Indake ong•genchimoba, uarangko taritaipilanio namen somoi cha•gipa aro man•dikbegipa kamba ong•skaachim.
Ia bijolini nosto ong•ani mongsonggipa a•selde, mikkarang waani gimin ong•enga. Chirang cable ning•arango napaha aro sub-station ge•antikon nirokna nangao ga•akengaha, indake, da•o dipet dam 9 sub-station-rangko tariman•aha ine engineer aganaha.
Mingipin a•selara, rika cho•ani kamrangko ka•engamitingo a•a cho•engon cable-rang chotatako man•enga ineba official saksa agandapataha.
Indake NEHU, ia bijoliko taritaipilanio, Meghalaya Energy Corporation Limited (MeECL)-ni dakchakanikoba bi•atenga aro mikkangchiba iandake apsan dakgipa obostarangko chagrongna nanggenchimoba uamangan dakchakangkugen ine official saksa aganaha.
Iani gisepon, NEHU-o poraienggipa chatro chatrirang, Shillong-o songdongenggipa maharirangni nokchi re•angesa mobile phone-rangko charge ka•enga aro au miksuenga, indiba jemangan Shillong-o mahari dongpaja uamangde bilongen neng•nikaniko man•batenga ine aganaha.
Na·simang ia video-koba nina man·gen:
Na·simang iakoba poraina man·gen: Sikkim-o tin·kagimin surini chiringko Science-ni gita am·sandia
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
