Williamnagar, Mar 18: North Eastern Hill University (NEHU)-ni porikkao teng•sugipa Loyola College-ni sak 11 chatro chatrirangna Mongolbar salo, Williamnagar-ni MLA aro Meghalaya a•dokni Cabinet Minister Marcuise N Marak, college campus-o program-ko ong•atanio mande ra•pilskaaniko dakangaha.
NEHU porikkao teng•sugipa chatro chatri sakpraknan mande ra•pilskaani chin gita ua laptop-rangko on•angaha.
NEHU porikkao teng•sugipa Loyola College-ni chatro chatrirangara Garo subject-o Rank 1-ko man•gipa Jenash M Sangma, Garo-o Rank 2-ko man•gipa Bivetejang R Marak, Garo-o Rank 3-ko man•gipa Tengsuraksal N Sangma, Garo-o Rank 4-ko man•gipa Harima G Momin, Garo-o Rank 5-ko man•gipa Tengku N Marak aro Namrang Ch Sangma, Garo-o Rank 6-ko man•gipa Chijanggikadime G Momin, English-o Rank 6-ko man•gipa Lusica Dalbot Shira, Garo-o Rank 7-ko man•gipa Achirim R Sangma, Garo-o Rank 9-ko man•gipa Allina D Sangma aro Garo-o Rank 10-ko man•gipa Brian Minggam R Marak ong•a.
Ia program-ko ong•atanio, a•dokni Cabinet Minister Marcuise N Marak, jinmana aganprakengon, ia porikkao chu•sokgiparang ong•ahani gimin an•tangni namgipa skanirangko on•angenba, ian uamangni bimchipani, namgipa gunko ja•rikani aro miksongani donganiko mesokani ong•aha ine parakataha.
Chu•sokaniara badiaba biapona sokanikosan miksonga ong•ja indiba bon•changgijagipa songreanisa ong•a ine janapatengon, da•alo ia chatro chatrirangni chu•sokgipa ong•aniara uamangni on•kangani aro Loyola College-ni namgipa gunko mesokaniba ong•aha ine Marak aganaha.
Ia chu•sokaniara uamangni janggi tanganikosan ong•aigija songsalo dingtanganiko ra•baaniba ong•gen ineba Marak aganaha.
A•doko lekka porako tang•doatna sorkarini on•kange kam ka•enggipani gimin janapangengon, skie ra•ani aro dal•roroanio technology ba gital kolrangko jakkalna nangani giminba Minister aganangaha.
Ia laptop-rangara lekka poranio jakkalgipa kolrangsan ong•aija indiba bon•changgijagipa cholrangona cholguga gitan ong•a ine janapatengon, ian uamangni mikkangchi re•mikkanganio sorkarini dakchakanirangko on•na kang•kare kaaniko mesokani ong•a ine Marak aganaha.
Meghalaya a•dokni Chief Minister Conrad K Sangma-ni dilanichi chadamberangko mangrakbatatna gita dingtang dingtang cholrangko a•bachengate on•aha ineba ia tom•anio Marak parakataha.
Chadamberangni changa sapani aro u•i-ma•siani kri sorkari dakchakanirangko aro cholrangko on•na ku•rachakenga ineba Marak aganaha.
Ia tom•anio, Loyola College-ni Principal Fr Stephen Athikho-ba jinmana aganprakengon, Loyola College-ko a•bachengaonin pilak nanga dakchakanirangko on•engani gimin Cabinet Minister aro Williamnagar MLA Marcuise N Marak-ko mittelpilangaha.
Ia program-ko ong•atanio dongpae bak ra•anggipa gipin manderangara, gitcham MCS Officer Seldin N. Sangma, Loyola College-ni Rector Fr. Melvil Parera, Materdei Parish-ni Pamong Fr. Lawrence aro gipinrang ong•a.
Na·simang ia video-koba nina man·gen:
Na·simang iakoba poraina man·gen: Aizawl-ni Treasury Market-o wa·al kamanichi te 60 dokkanrang nisigalako man·a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
