Shillong, June 2: NEHUSU ni gita adita ja rangna skangan uamangni nangnike dabienggiparangni bidingo Vice Chancellorna u•iatani aro mol•moani ja•manoba maming aganchakani aro an•pilchakaniko man•jaengani gimin Bristibar salo chatro-chatrirang jinma ong•kate universityni ning•o donggipa Central Library mikkango jingjengatangaha. Uamang chrik-a•boke re•roroe administrative nok mikkangoba uamangni nangnikani aro dabianirangko chrik a•boke dabiangtokaha.
NEHUSU ni mongsonggipa dabienggiparangara, NEHU Campus-o bang•a kamrangon bangbang ong•enggiparang gnangengpitti uarangko kolgapatna, Pro-vice chancellorko ta•rake songe on•china, school of Technologyni gnigipa phaseko a•bachengatchina, antignini gisepo nangdapkuenggipa bus garirangko on•china, plak chatro-chatrirangna hostelrangko on•china, girls hostel rikenggipako ta•rake rikchina, NEHU health care-o chu•onga gita samrangko on•china aro konta 24 uno kam ka•giparang aro ambulancerangko donchina, basket ball aro robol kal•chakramrangkorangko namdapatchina, Ph. D na seokengon NEHU ni aro Meghalaya a•dokni chatro-chatrirangko skang done seokchina, scholarshiprangko bariatchina, NET porikka senagiparangna coachingko on•china, UPSC aro SCC gita dakgiparangna coaching centre rangko kulichina aro gipin rang ong•a.
Chatro-chatrirang administrative nokmikkkango jegalengmitingo VC Prof. Prabha Shankar Sukhla re•bae ka•dongatani kattarangko aganaha. Dabienggiparangoni aditakode chu•sokatna man•gen ine ua ku•rachakaha. Indiba chatro-chatrirang VC ni lekkao see on•e ku•rachakanikosa nangniktokaha.
“Ia universityna nangenggiparangna jingjengatna nangpile dabianiara namen kratcha•ani ong•pila gita ong•a, chinga iako rama-sorokrangona ong•kate dabina skangan uamang chanchininge kam ka•na nangachim. Chingni hostelrango ringani chi mangmangba sel•tagija aro rongtalgijakosa man•enga, sao-ding•o nanggipa samrangkoba man•a neng•bea. Iarangko chinga jinmana u•iatna nangpile dabina nangjok. Indiba chingni dabienggiparangna ka•dongchakaniko VC aganahani gimin chinga chu•ongnikbejok” ine kobor ra•timgiparangna NEHUSU ni padot Mesan Dkhar aganaha.
