Tura, Dec 20: Garo Hills Autonomous District Council (GHADC)-ko mikkangchi nambatatna gita Administration kam ka·enga ine GHADC-ni Secretary Rikse R Marak parakatenba, chakchikani gnang kakket-o kamrangko ka·angkuchina aro Non-Gazetted Employees Association (NGEA)-ni jingjengatanirango bakko ra·jachina gita GHADC-o kam ka·enggiparangko aro officer-rangko didiangaha.
GHADC-o kam ka·enggiparangko kam ka·jachina aro jingjengatanirango bakko ra·china NGEA-ni dilgiparang didienga ine koborko man·soahani gimin, kam ka·giparangko NGEA baksa bakrimjachina aro kamtangtangko chakchike ka·angkuchina gita GHADC-ni secretary didiangskaaha.
Marak-ni u·iatani gitade, GHADC-o tangka paisani gita neng·nikanirangko chagrongna nangengoba kam ka·giparangna Krismasna skang, 2018 bilsini July aro August jani dormaharangko on·na GHADC-ni administration kamrangko ka·engahachim.
Dormaharangko on·na kamrangko ka·engmiting somoio GHADC-ni dingtang dingtang department-rango kam ka·enggipa manderangko kam ka·jachina gita NGEA-ni dilgiparang didiskaenga ine badi ka·anirangko GHADC-ni administration man·soskaahachim.
GHADC-ni kamrangko champengengani gimin aro kam ka·giparangko kam ka·na on·jaengani gimin NGEA-ni kosako GHADC-ni secretary FIR ka·doangaha.
Re·anggipa antionin NGEA dolni gita, jagittamni dormaharangko gital pay scale-o on·china dabie GHADC office mikkango jingjengatanirangko dakengahachim.
Indake ong·genchimoba, GHADC-o tangka paisarang dongjani a·sel kam ka·giparangna jagnini dormaharangkosan on·na man·aigen ine administration parakatskaahachim.
“GHADC-o tangka paisani gita neng·nikanirangko chagrongna nangengoba chinga a·dok sorkariko mol·mole da·o jagnini dormaharangkode on·na man·engahachim. Dormaharangko man·jaengani a·sel GHADC-o kam ka·enggipa manderang neng·nikanirangko man·na nangtokenga ine chinga ma·sichaka indiba mikkangchi iandake GHADC-o tangka jakkalsretaniko bon·atna aro kam ka·anirangko nambatatna gita chinga jotton ka·engani gimin kam ka·giparangko aro officer-rangko chakchike kamko ka·china chinga mol·molenga,” ine GHADC-ni secretary Rikse Marak parakataha.
Marak-ni parakatani gitade, ia NGEA-ara sorkario register ka·gimin dolba ong·jachim aro da·o dipet ia dolko Cooperative Society-ni gitaba renew ka·na ra·chakkujaengachim.
