Tura, March 8: Garo Hills Autonomous District Council (GHADC)-o kam ka·enggiparangni chu·gimik ja 31-ni dormahako on·china dabie re·anggipa February 18 tarikoni da·alona kingking kamtangtangko ka·gija jingjengataniko ong·atahaoba a·dok sorkarini mamingkoba aganchakjani gimin re·baenggipa March 10 tarik Butbar saldipet okgimu chake jingjengatangskagen ine parakataha.
Ia okgimu chake jingjengataniko Butbar saloni Sukrobar salona pring 10 bajioni attam 5 bajiona ong·atgen ine Sombar salo tom·aniko ong·ate NGEA tik ka·angaha.
Uni gisepon a·dokni skotong minister Pa Conrad Sangma mamingkoba aganchakja ong·ode, re·baenggipa March 15 tarikoni sima-ari dongija antigimik konta 24-na kingking okgimu chake jingjengatanggen ineba NGEA-ni padot Pa Senora Johny Arengh koborna parakataha.
“Ia okgimu chake jingjengataniko dakengon, GHADC-o kam ka·enggiparangoni bilsi 50 aro 60 batgipa me·chikma-me·aparang, bi·sa chona donggiparang aro jak-ja·a sa·dikgiparangko watchange, Tura-o songdongenggipa manderang jemangan GHADC-o kam ka·e dukko man·enggiparangna ka·sachakgiparang aro NGO-rangoni jeba re·bae bakko ra·ena man·gen, uamangko chinga rimchaksoa” ine NGEA-ni dilgiparang u·iataha.
“Maini gimin Ma Marak, GHADC-ko wate re·angna sikjaenga? a·bachengode ua da·al aro knalni gisepoba na·simang namnikjaode kam wate re·angaigen ine ku·rachakachim ine janapatenba, Chinga re·anggipa March 3 tarikoni da·alona kingking office napram cholgugao jinma tom·dake GHADC-ni jakrikra Ma Rikse Marak-ni kamko jegale uko kam wate re·angchina dabiahachim, indiba da·alona kingkingan ua kam watani chittiko on·kuja aro sorkariba chingni dabiako knachakgija namrenge ra·enga” ine NGEA-ni dilgiparang suk ong·gijaniko parakataha.
