Shillong, Jan 20: India a·songo ming 3 gital niam amarangko ra·gatna kam ka·enga. Ua ming 3 niam amarangan Indian Penal Code (IPC), 1860; Code of Criminal Procedure (CrPC), 1973 aro Indian Evidence Act, 1872 niam amarangni pal ong·skagen ineba niksoenga.

Bharatiya Nyaya Sanhita (BNS) — Indian Penal Code (IPC), 1860ni pal ong·skagen;

Bharatiya Nagarik Suraksha Sanhita (BNSS) — Code of Criminal Procedure (CrPC), 1973ni pal ong·skagen;

Bharatiya Sakshya Act (BSA) — ian Indian Evidence Act, 1872ni pal ong·skagen.

Ua minggitam gitalgipa niam amarangni bidingo Union Minister Amit Shah Shillongona re·baon adita journalistrangna talate on·angaha, aro uarangko ra·gatahaon Indiao kakket bichalaniko man·anina dakchakbatgen ineba ku·rachaksoaniko kattarangko aganaha.

Journalistrangni sing·anirangna Amit Shahni aganchakanirangko iano adita gatatenga:

Sing·ani: A·songo niam pe·ani bidingo ra·gatgnigipa ming 3 niam amaranga me·chikrangko aro bi·sarangko chel·chakna gita mikpakma nie tarigimin ong·a ine agantokenga. Iani bidingo talatna man·genma?

Amit Shah: Me·chikrangni aro bi·sarangni naljokanian Modi sorkariode mongsongbegipa ong·a. Uni giminan niam amani skanggipa bako me·chikrangni aro bi·sarangni naljoke dongani gimin ong·a. Niamni ning·o 35 sectionrang gnang, jerangan me·chikrangni aro bi·sarangni naljokanina tarigimin ong·toka. Mesokna gita, jinma drae til·ekanina bilsi 20 aro sia sijana patoko dongna nanggen. Bilsi chu·onggijako jinma drae til·ekode pasi on·ani ba janggi tanga gimikna patoko dongani ong·gen. Tol·e ku·rachake me·chikming turimani bidingoba gital niamko tariaha. Me·chikrang aro bi·sarangko chel·chakna gita niamo donggijaniko chinga gapataha. Chinga Supreme Courtni mesoke on·anirango pangchake niamrangko tariaha.

Skangode, me·chikrangni kosako namgijako dakon, statement on·ako jakchi see rakkiachim, aro ua see rakkianiko ja·mano kal·akdapna man·achim. Indiba da·ode kal·aka man·gipani nokdangni mikkangon agangipa kattarangko chipe ra·na nangchongmotanio niamo napataha. Internet jakkale statement on·ani aro mikkang pa·anikoba niamo obostani kri napataha. Ian manderangni dakbewalrangko aro kakket bichal ka·aniko dingtangatgnok. Tol·e ku·rachake me·chikming dakani bidingoba niamko tariaha.

Sing·ani: Indiba skangonin jakkalbaenggipa niam ama ming 3ko maini gimin galskana nanggen?

Amit Shah: Bharat a·songo a·songtangni niaman dongna nanggen. Killa Gitchako Modini aganarangko na·simang gisik ra·enggen: gipin a·songoni re·bae tarie donanggipa niamrangko galna nanggnok. IPC, CrPC aro Indian Evidence Act niam amarangko Britishrang tariasan ong·ja, kattarangba uamangnisa aro democratic systemo jakkalna melibea ong·ja. Uamang an·tangtangni gamko chel·chake rakkinasa niamrangko tariaha. Uni giminan ua niamrangora sorkari gamko ra·sekani, rel garioniko ra·seke ra·ani aro sorkarini manderangni kosako chadrapanirangsa mongsongbatgipa ong·aha. An·chingni jakgitelgipa a·songo me·chikrangni naljoke dongani bidingo niam donganian mongsongbatgipa ong·na nangjawama?

Skango tarigimin niamranga sorkarini kosako chakatna man·jana gita aro golmal ong·jana gita tarigiminrangsa. Indiba Modi sorkarini tarienggipa niamranga kakket bichalanio pangchakgipa niamrangsa ong·a.

Anga kim·kimen aganna man·a, ia niamrangko tariahaon an·chingni criminal justice system kom·kie dongna nanggipa bewaloni jokgnok.

Sing·ani: Ia niamrangko tarina skang a·songni manderang baksa ku·mongchengani gri ine matnanganirang gnang.

Amit Shah: Na·simang opposition dolni kattarangko agrepile dal·e ra·engakon. Niamrangko tarina gita a·songni manderango sing·jojoani 2019 bilsion a·bachengaha. Uni gisepon, manderangni namnike mesoke on·gipa hajalni hajal niamrangko nigrikaha aro uarangoniko nigrike niamo napataha. A·songo niam tario indake sing·jojoe manderangni namnikanina kam ka·anian skangode dongkuja.

Tarigimin niamrangko Home Ministryni standing committee nichina watatahaon, ua niamrangko kam kama ka·na Prime Minister Modi a·bachengaha, aro uan bebe ong·ani, darangchiba tenggilgijani aro aro darangnan kakket bichalko on·anio pangchaka.

Sing·ani: Ia niamranga mokordoma ong·aniko bichalanio tarik ra·dororoe bakroataniko bon·atgen ine na·a aganrongenga. Talatna man·genma?

Amit Shah: Anga mingsako jaksi ote mesokna. Bank-o cheque bounce ong·gipani bidingo mokordoma ong·anio tarik ra·dororona nangania bang·bata somoion bank offialni dongpajani a·sel ong·ronga. Indiba da·ode bank officialrang courtona bimangchongchong re·anggijan sakki on·na man·gnok. Courto forensic pathologistni sakkiko sengoba bang·a salrangkon nangronga ine an·ching u·ia. Indiba da·ode uamangba courtona mandechongchong sokanggija hospitalonin, online, watatna man·gnok. Uni gimin, tarik ra·dororona nangani katta dongjawaha. Bichal ka·e on·anio ta·rakan baksa darangnan parak pasang ong·gnok.
Ta·raken bichal ka·aniko on·china gita niamni ming 35 bakrango police, court aro mokordoma chalaiani bidingo dona gnang. Toe mesokna, drae til·ekaniko che·eme sandie uko sal 7ni gisepon on·na nanga. Pilak obostaon, kachario gadochengaoni sal 7ni gisepon badi ka·ani bidingo segatanirangko matchotna nanggen. Niamo sakkirangko online on·na man·eba taria gnang. Recordrangko aro summon-rangko online dakatna man·anian mokordomana somoi ra·aniko ta·rakatgen. Ia niamrangko ra·gatahaode je dakgipaba mokordomakoba bilsi 3ni gisepon matchotatna man·gen.

Sing·ani: Dos dakgiparangni kate donganian bichal ka·e on·giparangna kam rakatronga. Indakgiparangna niam gitalo maikoba dakani gnangma?

Amit Shah: Bilsi 10 aro una batgiparangko dos dake katchipgipa ine chanani donggen. Uamangni mal-mattako Bharatni a·palonikoba sorkari kepna gita niam donggnok. Saoba Switzerlando mal-matta dongon uko kepe ra·na skangode niamo donsoa grichim, indiba da·ode donggnok. Katchipgiparangko uamangni donggijao mokordoma chalaina da·ode niamo donaha. Mesokna gita, skango Mumbaio boma gopretanio mongsong pota man·gipade Dawood Ibrahim, indiba be·en nokgipaan dongjani gimin uni kosako mokordoma chalainan man·ja. Da·o indake dos dake katchipgiparangko mokordoma chalaina niamo donaha. Uamangko dos dakgipa ine rai on·ahaode je a·songo dongoba rim·e ra·bapilna man·aignok. Tangka-paisani mokordoma ong·anio dos gatdapa man·giparangni mal-mattakoba ia niamko ra·gatani ja·manode kepna man·aignok.

Sing·ani: Dos dakako man·gipara ia niam tarianirango maikai mongsonggipa biapko man·a?

Amit Shah: Britishni tarianggipa niamode badi ka·a man·gipa aro sorkarini giseposan ong·rongaia, dos dakako man·gipade nadopaja. Dos dakako man·gipa pilak obostaon ukil rim·na man·e da·ode niamko tariaha. Skangode, saoba badi ka·ako man·gipako mokordoma chalaiako sorkari ra·gale matchotaton dos dakako man·gipakode sandirongja. Indiba da·ode, dos dakako man·gipani namnikpaako man·gijade mokordomako bon·atna man·jawa. Skangode police dolba re·angari sandie, rim·na nangako rim·e kepe ra·bana man·a. Indiba da·ode indake dakako video ka·na nangtelgen, aro uano dolgnionin ong·gijagipa sakgnide sakki dongpana nanggen. Skangode mainiba bidingo badi ka·ode kam ka·gija donganirang gnang. Indiba da·ode badi ka·ani sal 90ni gisepon dos dakako man·gipana police u·iatpilna nanggnok. Skangode police mandeko rim·e ru·uta antirangnan nokdangni manderangna u·iatgijaba donaia. Indiba da·ode rim·a man·gipa manderangni bidingo u·iatna gita dingtangmancha officerko donani ong·gnok. Skangode togie cha·boke cha·giparangko rim·ani gnangode togia cha·boka man·giparangna gamatpilanide gri. Indiba da·ode cha·boka man·gipana cha·bokgipani gamonikon gamatpilani donggen.

Iaranga dos dakako man·giparangna namgni ong·gen. Skangode sakki on·gipa chel·chakani bidingoba kacharisa dakna nangako daka, indiba da·ode a·dok sorkarian sakki on·gipana chel·chakaniko on·na nanggen. A·dok sorkari Witness Protection Schemeko u·iatgen aro police station uko kam ka·gen.

Sing·ani: Ia niamranga silchidare de·e bobil dakgiparangkode dingtang dake ra·gen ina. Talatna man·genma?

Amit Shah: Skanggipa changna, terrorismni bidingo niamo che·em che·em talataha. Terrorism maia uko niamo dokbadale talatnian griode uko kam ka·na amgija ong·a. Terrorism maiko mancha miksonga talatanian griani gimin pangchakna man·jae bang·a changon terroristrangko watna nangaia. Uani bidingo jera ra·angode policeba aganchakna man·gija ong·ronga. Niam gitalode terrorismna on·tisaba chakchikani dongjawa, mai dakako terrorism minga uko niamon talata.

Sing·ani: Sedition ba a·song aro sorkarini kosako chakatatgnigipa kattarangko saniba aganani bidingode niam gitalo gri, indiba treason ba a·song aro sorkarini kosako dos dakani bidingode gnang. Ia minggniara maidake dingtanggrika?
Amit Shah: Sedition ba Rajdroh aro Treason ba Deshdrohni gisepo bang·en dingtanggrikani gnang. Skangode sorkarini kosako agangipa kattarangko niam pe·ani ine dona. Ua niamni gitaan Lokmanya Tilak, Veer Savarkararo Mahatma Gandhimangko bichal ka·e patoko donatachim. Iano chinga Sorkari ba Raj inako ra·galaha. Uni palo A·song ba Deshdroh inako jakkalskaaha. A·songni niam bidikni Article 1-on maiko A·song ba Desh minga talata. Uno janapani gita, A·song ba Desh inon seokgimin sorkariko miksonga ong·ha, Indiba ba Bharatkosa miksonga. Bharat a·songni bilgnangani aro ku·cholsan ong·ani kosako re·gipade bilsi 7 patoko dongna nanggen.

Sing·ani: Community service ba jinmana dangdike on·ani bidingo mai dakgipa niam pe·anirangko janapa gnang?

Amit Shah: Ramram samsam dos dakanirangkode gamatani aro patoko donaona sokatja. Mesokna gita, saniba niam pe·ania miksongmanchae dakade ong·ja ine nikode ua mande nambata bewalo janggi tange jinmana dangdike on·kuchina gita niamni gita nigrikani donggen.

Sing·ani: Niam pe·e kam ka·na gita dingtangmancha maiba kamko jako ra·ani aro dol dakani bidingo maikai kam ka·gen?

Amit Shah: Uan organized crime, indiba uko niamni gita dokbadale talatani dongjachim. Skanggipa changna chinga uko dokbadale talataha. Organized crime inode bang·a manderangan badiaba dos dakanirangkosan chanchiaia. Bi·sarangko bi·amna gilamna wataniba organized crime. A·songni sima-ariko ga·bate silchidare badingani, pekgipa cha·a ringanirangko badingsrukani, terrorism, me·chik badingani, tangka tarisrukani, dakait dol aro indakgiparangan organized crime ga·aka. Indiba organized crime-rangko jako ra·na gita dingtangmancha niamrang chu·ongjachim. Saoba mandeoniko AK47 man·ode ukoara an·tang pistol tarie jakkalgipako bichal ka·a gita apsanen bichal ka·aiachim. Indiba da·ode namen dingtanggnok. Kattani kattana, sakoba AK47 gnang rim·ode uko organized crimeni niamo pangchake bichal ka·gen, maina uan gipin a·songoniko ra·bagipa bostu ong·a. Ian niamko rakkigipa dolrangna bilko on·gen.

Sing·ani: Niam gitalranga technologyko jakkalna changgiparangni niam ine agantoka. Chasong gital technologyara niamko rakkiani bidingo maidake nangchapeskaa?

Amit Shah: Niamrang gimikkon gital dakna miksongen ia niamrangko tariaha. Uarang pilakan chasong gitalni technologyko man·a gita jakkalchapa. Re·baenggipa bilsi 50ni gisepo nakatgipa technologyko jakkalna man·kuna gitaba niamrangko tarisoaha. Mesokna gita, skangode chargesheetrangko lekkaosan see donachim, indiba da·ode uko pendriveoba donna man·gen. Skangode sakki on·giparang kachariona gadoe sakki on·na nangachim, indiba da·ode online-ba man·gen. Skangode summon waton nokona ra·angna nanga, uara basakobade adita jarang nanga. Indiba da·ode WhatsApp gitamangba summon watatna man·gen. Apsan daken, e-FIR aro zero FIR-rangba donggen. Bilsi 7 batgipa mokordomarangnade forensic science changgipani kamrangkoba nangchaptelna nanggnok. Ian niam chalaiani a·bao scienceni gita sakki dongna nanganikoba man·chapgen

Iakoba poraie nina man·gen: Dingtang ramako jakalanina ‘Bharat Jodo Nyay Yatra’-ni kosako FIR ka•doa

Watch