Shillong, Mar 3: Meghalaya a•doko niam gri koela badinganiko aro pilak ong•gija kamrangko champengna gita police department-o kam ka•giparang chu•ongjaenga ine home minister Lahkmen Rymbui-ni agananiko Meghalaya Pradesh Congress Committee (MPCC)-ni working president Deborah Marak jegalataha.
Marak-ni parakatani gitade, Congress sorkarini somoion bobil dake chakatgipa dolrangko warachakna police-rang chu•ongachim aro da•o niam gri koela badinganiko champengna police-rang chu•ongjaenga ine home minister-ni agananiara kakket ong•jachim.
“Una saobasa tol•e aganahakon, ong•jaode ua a•doko ong•enga obostarangkon name ma•sijaengakon. Anga an•tangba koela a•dam jolonin ong•a aro anga walni somoio Shillong-oni Williamnagar-ona songrea changantian koela garirangni re•ruraanirangko nikna man•enga,” ine Marak aganaha.
National Highway-rangon nangana batpile police-rangko nikna man•engani gimin home minister-ni agananiara bikpilsa ong•enga ineba MPCC-ni working president parakataha.
“Dainadubi NH ramani metre 100-200-prakon police garirangko aro police-rangni nitimanirangko nikna man•enga. Indide uamangara ua biapo maiko dakskaenga aro sako chel•chakna dongenga?” ine Marak sing•doangaha.
East aro South Garo Hills a•jani district administration-rang kamrangko ka•anio cholijaengani a•selan koela salgipa truck garirang re•rurana man•enga ineba Williamnagar-ni gitcham MLA matnangataha.
