Shillong, May 2: Niamko ja·rike nama aro kraa bewalo a·dokni koelarangko bikotani bidingo Central Mine Planning & Design Institute Limited (CMPDI) aro Forest and Mining-ni department baksa tom·e chanchirimangani ja·man, niam gita koelarangko bikotnasienggipa sakbri manderangni mining lease-rangko India sorkarini ra·chakanganiko a·dokni skotong minister Pa Conrad K Sangma, Mongolbar salo parakataha.
Koelarangko bikotani ja·man ua a·arangko namgnina jakkalpilna gita miksonganirang baksa sorkari kamko ka·enga ine Pa Sangma janapatenba, a·ningni gamko bikotani kamrang chonoba, dal·oba chinga iani bidingo kamrangko ka·enga aro koela bikotani a·arangko jakkalpilani kamna a·dok sorkario tangkarangba dongenga, uni giminsa chinga pilak kamrangko ka·chakatna gita tariaha aro bang·a agency-rangming agangrikanirangkoba dakaha, jeni giminan chinga da·alo ia pilak kamrangko dingtangmancha sapgimin India sorkarini agency, CMPDI baksa tom·enba chu·gimik kamrangko a·bachengatani gimin che·em-che·em golpoe kamrangko ka·enga,” ine Pa Sangma janapataha.
Scientific mining ba niamo pangchake a·dokni koelako bikotna nangchongmotengani gimin aganangengon, Pa Sangma, scientific mining-ko dakna ba a·dokni koelako bikotani kamrangko a·bachengna gita mining lease-ko ra·chakatani bidingo mongsongbate chinga neng·nikaniko man·engachim ine janapatan baksa, niamko ja·rike koelarangko bikotna gita re·anggipa antio India sorkarini, sakbri manderangni mining lease-rangko ra·chakangani giminba ua an·tangni kusi ong·aniko parakangjolaha.
“Scientific mining-ko a·doko a·bachengna gita mongsong rakbatgipa kamko da·o matchotahani gimin, iani bidingo niam gita dakna nangkuenggipa kamrang jekai public hearing, mining plan-ko ra·chakani aro forest-oniko ra·chakako man·ani ja·mande niamo pangchake koela bikotanirangko a·bachengna man·gnok aro ia ra·chakatani kamrangko matchotna sal 30 oni sal 45-rangsan nanggnina chinga ka·dongsoenga ineba a·dokni skotong minister janapatjolaha.
Iakoba poraie nina man·gen: Sikkim, Nathula sambao jachanggipa sak 40 tourist-rangko BRO-ni manderang naljokata
