Shillong, Jan 8: Meghalaya Lokayukta Act 2014-ni ning•o dongimin niamrango pangchakesa a•dok sorkari, Meghalaya Lokayukta-ni officer-rangko kamoniko ra•galataha ine Sombar salo, National People’s Party (NPP)-ni ku•wattimgipa Himalaya M Shangpliang talataniko on•angaha.

Garo Hills Autonomous District Council (GHADC)-o tangka paisa jakkalsretaniko rim•a man•ahani giminsa Meghalaya Lokayukta-ni officer-rangko a•dok sorkari, kamoniko ra•galataha ine Voice of the People’s Party (VPP) matnangahani gimin Shangpliang, ia talataniko on•angaha.

Kamoniko ra•gala man•gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong•achim.

Iani bidingo talataniko on•angengon, ia official sakgittamni kamrangara, Meghalaya Lokayukta Act 2014-ni ning•o dongimin niamni kosako ong•engani giminsa ia official sakgittamko kamoniko ra•galaha maina Meghalaya Lokayukta Act 2014-ni ning•o dongimin niam gitade, je officer-rangan sorkarini kamo ong•kuengachim, uandakgipa officer-rangkosa Lokayukta-ni investigation official dake seokna man•a indiba ia sakgittam official-rangara kamoni neng•takgimin officer-rangsa ong•achim ine Shangpliang parakataha.

Shangpliang-ni talatani gitade, Meghalaya Lokayukta Act 2014-ni Section 10 (2) aro 11-o pangchake, Lokayukta-ni officer-rangara department-onisa ong•na nanga aro sorkari kamoni neng•takgimin mandede department-oni ong•na man•ja.

Ia official sakgittamko ra•galaniara maming dakeba GHADC-o tangka paisa jakkalsretani baksa nangeani dongja ineba ua talataniko on•angaha.

Ia official-rangni biapo sorkari, IAS officer IW Ingty-ko Inquiry & Prosecution-ni Director songe, MPS officer sakgittam, chong•motan Chalang G Momin, John C Sangma aro Baniateilang Diengngan-ko membor-na sorkari, 2023 bilsini December 19 tariko songskaaha ineba NPP-ni ku•wattimgipa parakataha.

Lokayukta-ni kamrango jak on•paenga ine Chief Minister Conrad K Sangma-ko VPP-ni matnanganina aganchakaniko on•angskaengon, Meghalaya Lokayukta-ni officet-rangko seokanio a•dokni Chief Minister ba a•dok sorkari maming saloba jak on•paa dongjachim ine Shangpliang talataniko on•angaha.

Iakoba poraie nina man·gen: All Assam Non-Provincial Teachers and Employees, Guwahati-o re•jomaaniko daka

WATCH:

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub