By Norahee Sangma
Da•ororo a•doko mongsongbatgipa neng•nikanirangara aro koborrango niksona man•batgipara MeECL-o ong•enggipa obostarangan ong•a.
Re•anggipa sal somoi rango, Chairman-cum-managing Director (CMD) Mr. Arun Kumar Khembhavi, Byrnihat, Ribhoi district ni ning•o donggipa karkanarangoniko sing•sandianirangko dakon mitam Engineer rangni niam gri Kam ka•anirangko rim•na gita man•aha.
MeECL ning•o niam gri kam ka•anirangko sandiroroengon, MeECL Union ni dilgipa Pa P.K Chullet jean Coordination Committee of Registered MeECL (Employee) Association and Union (CCORMAU) aro MeECL Engineers’ Association ni Padot (President) ong•achim.
Unbaksana ua MeECL Joint Action Committee ni chairman ba ong•achim. Re•anggipa sal somoi rango MeECL ni ning•ao niam gri kam ka•anirango Pa P.K Chullet bang•en jak donga ine matnanganirangko man•aha. Ua dingtang dingtang dakgipa kamrangna tender on•anirango aro bill tarianiarango, tangka paisarangko jakkalsretanirangko janapanirangkoba kobor ra•timgiprangni agananirango niksona gita man•aha.
Indake ua an•tangan niam gri kam ka•giparangoni saksa ong•e, sakgipinkosa jaksi ote Power Minister, Pa James Sangma aro CMD Pa Kembhavi kosa niam gri kamrangko ka•enga ine tol•e matnange kamoniko ra•galchina dabianirangko dakdilaha. Jedakode ua an•tangni niam gri kam ka•anirangoni dosioni jokna gita gipinkosa tol•e matnanganirangko dakskaahachim ine chanchichipna man•a.
Niatgenchimode, uni Pa James Sangma aro Pa Arun Kumar Khembhavi ko kamoniko ra•galchina dabianiara ua an•tang MeECL ni ning•o niam gri kam ka•anirangko mikkangchi dakangna man•jawaha ine niksoe kenchakesa uamangko tol•e matnanganirangko dakaha ine nikatna man•a. Indake ong•genchimoba je mandean kakketgipa ong•a ua pangnan chegipa ong•a. Uni gimin gisik ra•bo! Jean tol•achi ba cha•bokanichi sakgipinko galona jotton ka•a uandakgipa mande chu•sokna gita man•ja aro an•tangko ga•akonata.
Haita ia dakgipa kam rangko pindapna miksongesa adita matnanganirangko uamang ka•angaha ine chanchichipnaba man•a. MeECL ni ning•ao indakgipa niam gri kam rangko ka•bebegenchimode, Sorkari niam gita uamangni kosako case file ka•e kakket gipa am•sandianiko dakna nang•a!
