Shillong, Sept 1: India a•songni politics-o mitam dilgiparangsan niksamsoani gnang kamrangko chu•sokata aro uamangoni Purno Agitok Sangma-ba saksa ong•a.
India a•songni jakgitelko man•aoni sal 16-ni ja•man, 1947 bilsini September 1 tariko Purno A Sangma, Meghalaya a•dokni chonbegipa Chapahati songo atchiaha aro A•chik an•chi baksa atchigipa mande ong•e, ua pangnan jatna aro a•songni manderangna ka•sae dangdikgipa mandeba ong•aha.
Uni pagipa siangani ja•man Purno-ko Catholic Missionary-rang poraina gita rimangaha aro 1970 bilsirango ua politics-ni kamko ka•na a•bachengaha.
Politics-ni kamko ka•na a•bachengaonin ua kamtango bimchipgipa ong•e bakan chubata gadangona tang•doangaha aro 1977 bilsini Lok Sabha election-o ua seokako man•enba a•songni skotong New Delhi songjinmaona re•chakatangaha.
Ua politics-ni kamko Congress dolo nape ka•na gita a•bachengaha aro 1977 bilsioni 2016 bilsiona kingking changskuna ua dingtang dingtang dolrango Member of Parliament (MP)-na seokakoba man•aha.
1996 bilsio Purno A Sangma sagiko, Lok Sabha-ni Speaker-na seokaha aro ian uni ka•donggipa ong•anikoba mesokaha. Uni Speaker ong•e Lok Sabha-ko re•dilanio, uni mangkimaniko aro kam ka•na changaniko nike India a•songosan ong•aigija a•gilsakni gipin a•songrangoba dilgiparang uko mande ra•na a•bachengaha.
1999 bilsio PA Sangma sagi, Sharad Pawar aro Tariq Anwar baksa Nationalist Congress Party (NCP)-ko bikotskaaha aro ia dolni ning•on ua toromko mande ra•na, songsalna kakket ong•na aro songadam nokadamrangoba namroro silroroaniko ra•bana kamrangko ka•dilaha.
Politics-osan ong•aigija ua, India a•songni salgro salaram jolna dingtangmancha an•tangko on•kange kamko ka•dilgipa ong•achim aro 1988 bilsioni 1990 bilsiona uni Meghalaya a•dokni Chief Minister ong•e re•dilanioba dingtangmancha uni Meghalaya a•dokna on•kange kam ka•anirangko nikna man•aha.
2012 bilsio Purno A Sangma sagi, India a•songni dal•batsranggipa ‘President’-ni kamnaba susaaha aro uan Tribal-rangoni President-ni kamna susachenggipaba ong•e, uni aiao inmanbee ka•donganiko mesoktaiaha.
Parliament-ara national party-rangan gapgipa ong•ani gimin salgro salaram a•dokrangni ku•rangko Parliament-o gam•batatna gita 2013 bilsio ua National People’s Party (NPP)-ko bikotskaaha aro ia dolchi ua salgro salaram a•dokrangko ra•dona gita kamrangko ka•chakataha.
Indake ong•genchimoba, 2016 bilsio ua ru•utbea somoirangna saaniko man•enba, an•tangni bilsi 68 ong•kuengmiting somoion ua a•gilsakko watangaha.
Purno A Sangma sagini atchianiko salko an•ching manina siengon, uni India a•songna aro politics-na on•gilanirangko nipiltaina gita namgipa somoi ong•enga. Cholgri ong•gipa manderangko ra•dona aro jattangni manderangna uni ka•sae dangdike on•anian uko dingtangmanchagipa mande ong•ataha aro iana India a•songni mande sakanti aro mongsongbate A•chik a•songni manderang uko pangnan gisik ra•kamgen.
Iakoba poraie nina man·gen: USTM-ni skugipa Convocation-ko ong·atanga
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
