Guwahati, Sept 12: Adita salrangna skang, Nimaghat-o ring dubie a·sel ong·gipani bidingo Assam-ni Police-rang, Inland Waterways Transport (IWT) department-o kam ka·enggipa mande sakbongako man·chape gimik saksni manderangko, Robibar salona kingking rim·na man·aha. Ia ring dubie a·sel ong·anio mande sakgni siahachim aro saksade da·oba gimakuengachim.
Ia a·selni bidingo police-rang, Dhanbar Das, Jogen Das, Biju Kumar Das, Jayanta Dutta, Binod Barua aro Babul Neog minggipa manderangko Upper Assam-ni Jorhat a·jaoniko rim·aha aro sakgipin Prashant Pamegam-ko Majuli police station-o rim·aha.
Rim·ako man·gipa manderangoni Dhanbar Das aro Prashant Pamegam-de kewalirang ong·a aro gipin sakbonga manderangde IWT-o kam ka·giparang ong·a.
Re·anggipa Budbar attamo, komibeoba sak 90 manderangko chobaenggipa private ring bolsa, sorkarini ring baksa Nimati Ghat sambao chatingenba, chio dubiahachim.
Ia a·sel ong·anio sianggipa manderangni nokdangna Assam-ni Chief Minister Himanta Biswa Sarma, gong lak 10 tangkarang baksana sorkarini kamko on·na ku·rachakaha.
