Shillong, Aug 9: Meghalaya a•dokni secondary aro higher secondary skigiparangna skie on•ani program, National Initiative for School Heads & Teachers for Holistic Advancement (NISHTHA) 2.0-ko Sombar salo, a•dokni Education Minister Lahkmen Rymbui, Shillong songjinmani Directorate of Education Research & Training (DERT)-ni conference hall-o a•bachengate on•angaha.
Ia training program-ko a•bachengate on•angani somoio a•dokni Education Minister, jinmana aganprakengon, mikkangchi an•tangtangna namgni ong•nagipa ia online training program-o bakko ra•china skigiparangko didiangenba, skigipani kamko ka•na gitade dingtangmancha u•i-ma•sianiko aro changa sapaniko mandena nanga ine parakangaha.
Lekka poraniara chatro chatrirangko mande ong•atna aro songsalo namroro silroroaniko ra•bana mongsonggipa kamko ka•aha ineba Rymbui aganaha.
Lekka poraniko tang•doatna aro mangrakbatatna gita mingsa nangchongmotgipa kamara skigiparangna skie on•skaanian ong•a maina skigiparangan lekka porani gadangko dingtangatanio, namdapatanio aro ra•doanio mongsonggipa chabirang gita ong•a ineba Education Minister aganaha.
