Shillong, Nov 12: Meghalaya a•doko nitobegipa biaprangsan dongaigija jatni gitaba gamchatbegipa daka rikanirangko nikna man•a aro ian mongsongbate Garo, Khasi aro Pnar jatrangni songdongchakgipa biap ong•e, dingtang dingtang jatni manianirangkoba nikna man•a.
Ia manianirangoni Meghalaya a•doko jatni chrokanirangba mongsonggipa bak ong•a, jeon dingtang dingtang jatrang, mi misirangko pattienganina pattigipa ra•rongipako mittelpilna aro jatni daka rikaniko ripinge rakkina gita manironga.
Meghalaya a•doko iandakgipa manianirangoni ‘Nongkrem Dance’ ba ‘Shad Pomblang’-ba mingsa ong•paa aro ia manianiko Khasirang, sin•kari a•bachengachibara Smit songo manironga.
Ia salbongana ong•atenggipa Nongkrem Dance festival-ko Khasirangba mi misirangko aro gam-jinrangko pattienganina bilak-wa•sagipa ‘Ka Blei Synshar’-ko mittelpilna manironga.
Ia manianio Khasi me•trarang nitobegipa ganding chinrangko gane aro panterangba tonualrangko ra•bite chrokanio bakko ra•ronga.
Sukrobar salo ia manianiona Meghalaya a•dokni Deputy Chief Minister Prestone Tynsong, Justice HS Thangkhiew aro Sohra-ni MLA Kevin Mylliemngap-ba re•ange bakko ra•angpaaha.
