Nongpoh, Jan 27: Ri Bhoi a•jani Nongpoh jolrango drugs ba pekatgipa samrangko jakkalgipa chadamberang batrorobaengani gimin Budbar attamo Seng Samla Downgate-ni manderang, sam jakkalgipa manderangko am•sandienba, Nongpoh-ni Down Gate joloniko drugs badinggipa mande baksana sam jakkalgipa sakgittam manderangko rim•na man•aha.
Ia manderangoniko cocaine sam baksana adita bosturangkoba man•aha ine kobor on•aha.
Koborko on•ani gitade, Nongpoh jolrango pekatgipa samrangko jakkalani batrorobaengani gimin Budbar walo, Nongpoh Down Gate-ni chadamberang, sam jakkalgipa manderangko sandie ia sakbri manderangko walni 10:00 bajimango rim•na man•aha.
Rim•ako man•gipa mande sakbrioni saksade bilsi 30 ong•gipa Baiakmenlang Tiewsoh ong•achim aro uan ia jolrango niam gri samrangko palenggipa ong•achim. Gipin sakgittam manderangoni saksade Downgate-oni Ravi Sunar minggipa ong•achim aro saksade 20 Mile-oni bilsi 24 ong•gipa Amanlang Khongshei ong•achim indiba saksani bimingkode ma•sina man•kujaenga ine kobor on•aha.
Rim•a man•gipa manderangko ja•mano Nongpoh Police Station-na pakwate on•ataha aro ja•mano police-rang, ia manderangoniko man•gipa samrangkoba rim•e ia manderangni kosako NDPS Act-ni ning•o mokordomako ka•aha.
