Tura, Mar 28: Re•baenggipa April jani 19 tariko Lok Sabha election-ko ong•atengani gimin Bristibar salo, National People’s Party (NPP)-ni national president aro Meghalaya a•dokni Chief Minister Conrad K Sangma, North Garo Hills a•jani Mendipathar constituency ning•o donggipa Chisimari aro Keragalram songrangko man•chape dingtang dingtang biaprango Tura-ni MP aro NPP-ni candidate Agatha K Sangma-na campaign ka•angaha.
Ia tom•anirango, Meghalaya Assembly-ni Deputy Speaker Timothy D Shira, PHE Minister Marcuise N Marak, MLA Marthon Sangma aro NPP-ni gipin dilgiparangba bak ra•angtokaha.
Ia tom•anirango NPP-ni national president, jinmana aganprakengon, North Garo Hills a•jao NPP-chi dilenggipa sorkari, pilakni gitan namroro silroroaniko ra•baahani gimin jolni manderang, NPP-ni candidate-kon seoktaigen ine an•tangni ka•dongchakenganiko parakangaha.
A•dokna namroro silroroaniko ra•bana gita MP-rangara ma•mong sorkari baksa agangrikanio mongsonggiparang ong•a ine janapatengon, a•songni Prime Minister aro ma•mong sorkarini dilgiparang PA Sangma sagiko mande ra•ani giminsa Agatha Sangma-ni nanganirangko chu•sokate on•na gisiko nangbata ine Chief Minister aganaha.
PMGSY aro uandakgipa ma•mong sorkarini dingtang dingtang scheme-rangko ra•baanio a•doko NPP-chi dilenggipa sorkari, ma•mong sorkarini bang•en dakchakanirangko man•aha ineba Sangma aganaha.
Ia tom•anirango Tura-ni MP aro NPP-ni candidate Agatha Sangma-ba aganprakengon, a•doko namroro silroroaniko ra•badapangkuna gita NPP-ko seokchina jolni manderangko didiangaha.
Gipin political dolni candidate-ko MP-na seokgenchimode Garo Hills-na dal•en gimaani ong•gnok ine janapatengon, Tura-ni MP ong•e ua Garo Hills-ni nanganirangko ma•mong sorkarina ku•rang on•na man•aha aro batanggimin bilsidokni gisepo ua NPP-chi dilenggipa Meghalaya sorkari baksa nangrime bang•en namroro silroroaniko ra•bana man•aha ine Agatha aganaha.
Ia tom•anio, NPP-ni saksa dilgipa aro Meghalaya a•dokni PHE Minister Marcuise N Marak-ba jinmana aganprakangengon, Meghalaya a•dokko US Dollar Billion 10 economy ong•atna niksamsoani gnangsa a•dokni Chief Minister Conrad K Sangma kamko ka•enga ine parakataha.
Na·simang iakoba poraina man·gen: Mawlai Syllaikariah Dorbar, Lok Sabha election-o bak ra•jawa
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
