Shillong, Nov 11: NPP Nartiang Block Committee, Sukrobar salo, Wahhiajer, Iaw Pynsin-o tom·aniko ong·atenba seokgimin gital office bearer-rangko rimchakaniko dakangaha aro programo constituency-oni hajal batpile NPP dolna chakgiparang bakko ra·angtokaha.
Tom·anio, Nartiang-ni MLA aro a·dokni minister Pa Sniawbhalang Dhar, Mawhati-ni MLA aro minister Pa Dasakhiatbha Lamare, Jowai-ni MLA Pa Wailadmiki Shylla, JHADC-ni CEM Pa Thombor Shiwat, JHADC-ni NPP-ni MDC-rang aro gipinrangba dongpatokaha.
Tom·ao jinmana aganprakangengon, “manderang chingni nokdangko man·e cha·a ine aganronga, indiba anga indake aganna sikgen, chingni nokdang ka·saanio man·e cha·gipa ong·a uni giminsa Isol-ni pattianirangchi chinga a·dokni manderangna kamrangko ka·enga ine Umroi-ni MLA gitcham Pa Ngaitlang Dhar agan-parakataha.
Uandake. Jowai-ni MLA Pa Wailadmiki Shylla, tom·ao bakko ra·e aganangengon, NPP dolko 2012 bilsio songchengaha indiba a·dokna dangdike on·anirangko niatode gitcham party gita chacha batanggimin bilsi 10 rangni gisepon dolni namen bilakaniko nikna gita man·aha aro salgro-salaram a·dok gimikon NPP dolni MLA-rang dongahanichi ge·sa National Party ong·e ra·chakanikoba man·aha ine u·iatangskaaha.
Unbaksana, re·baenggipa eleksino NPP doloni susana am·enggipa candidate-rang sak 58 de da·oba dongaha ineba u·iatangkuaha.
A·dokni minister Pa Sniawbhalang Dhar-ba tom·ao bakko ra·e jinmana agananganio, Nartiang constituency-ni ning·o dingtang dingtang namroro-silroroatani kamrangna tangka-paisarangko chame on·anina a·dokni skotong minister Pa Conrad Sangma-ko mittelpilangan baksa, NPP dolara gipin political dolrango gita bakgni bakgittam dakgija apsan meli-nangrime ku·cholsan kamrangko ka·engani gimin namen bilakroroengga party ge·sa ong·enga ineba parakatjolaha.
