Shillong, Feb 18: Meghalaya a·doko petrol aro diesel-ni damko komiatpilahani gimin aro load shedding-ko ra·galatpilahani gimin NPP Shillong city-ni dilgipa, a·dok sorkariko mittelpilangaha.
Iani bidingo kobor ra·timgipa manderang baksa agangrikengon, Meghalaya a·doko load shedding ba bijoli kimitaniko a·bachengataoni konta 48 aro konta 72-ni gisepon a·dok sorkari ra·galpilna man·aha ine NPP Shillong city-ni working president Anthony Nongbri parakataha.
“Gitcham sorkarirangde ku·rangmangmangchisa kamko ka·aiaha indiba ia sorkari, manderangni nangnikaniko ma·sichake kamko ka·a,” ine Nongbri, gitcham sorkariko matnange aganaha.
MDA sorkariko Congress dolni matnanggipani bidingo janapatengon, Congress dol gita matnange aganna aro manderangko dilsretani kamde altugipa ong·a ine NPP-ni dilgipa aganaha.
Petrol aro diesel-ni damko komiatahani gimin sorkariko mittelpile aganangengon, manderangni badi ka·anirangko knachakahani giminsa sorkari, petrol aro diesel-ni damrangko komiataha ine Nongbri parakataha.
Tangka jakkalsreta ine sorkarini kosako matnanganirangara maming pangchakani gri matnanganisan ong·aia ineba Nongbri parakataha.
Congress dolni kosako matnange aganangkuengon, Tura-o MBOSE-ni a·sel so·sojengjeng ong·engmiting somoio aro Jaintia Hills a·jaoba koelani bidingo jegalanirangko dakengmiting somoio dosgri manderang siangna gita nangaha ine NPP Shillong city-ni dilgipa parakataha.
