Shillong, March 11: 2007 bilsio NTPC baksa bijolina songgigrikanio tangka paisani bidingo lekka kingsaoba janapa dongjachim ine Opposition dolni dilgipa Dr Mukul Sangma parakatenba, iani bidingo a•dokni Chief Minister Conrad Sangma-sa Assembly-ko dilsretna jotton ka•aha ine matnangataha.
“Uamang ia songgigrikanio maiko sea donga ukon ma•sija maina lekka kingsaoba tangka paisani gimin janapa dongjachim. Ia pilakan 2003 bilsini Electricity Act-o pangchake songgigrikanisa ong•achim,” ine Dr Mukul parakataha.
Dr Sangma-ni parakatani gitade, NTPC baksa songggrikaniko 2007 bilsio soi ka•aha aro uni ja•man 2008-2009 bilsirango gitcham chief minister Dr Donkupar Roy sagini dilanichi sorkariko rikani somoio da•o Chief Minister ong•enggipa Conrad Sangma, power minister ong•engachim indiba ua somoio ia sorkari, ia songgigrikaniko den•galani pal maming ja•kurangko de•skajahachim.
“Ia songgigrikaniko ua somoio uamang name nienba namja ine nikgenchimode maina ia songgigrikanio den•galjaha? Iani pal uamang gipin namnamgipa songgigrikanirangkosa den•galskaaha,” ine opposition dolni dilgipa matnangataha.
