Shillong, Jan 7: Covid sabisini a⋅doko giprorobataenganina aro omicron sabisina simsaksona gita Meghalaya sorkari songdonggipa manderangna gital niamrangko ra⋅gatangaha. East Khasi Hills district-o salruraenggipa garirangna odd-eveno pangchake garirangko salrurachina niamrangko ra⋅gatangaha.
Ia odd-even niamni ning⋅o, salsa watchang watchange ba gari numberni bon⋅kamgipa odd ba even numbero pangchake East Khasi Hills district-o salrurana man⋅gen. Sombar, Butbar, aro Sukrobar salrango odd number garirang salrurana man⋅gen aro Mongorbar, Bristibar aro Sonibar salo even number garirang salrurana man⋅skagen, indioba Robibar salode ia niamko ja⋅rikna nangjawa.
Ja 4 ba ja 5 lockdown ong⋅ani ja⋅man, Shillong songjinmao ramarang gari salruraanichi gapchettaipilaha. Upper Shillongoni Laichumiere-ona mangmangan kontagni somairangko nangpilengachim.
“Odd-even niamko sorkarini ra⋅gatanichi, salanti rama gapchetgipako komiataha aro chingnade ian namen dakchakbeani ong⋅jok” ine Hub news na taxi salgiparang aganaha. “Shillong songjinmao December jaode gari bang⋅tinge ramarang namen apchangketronga, unigimin da⋅o ia niamko ra⋅gatanichi ramarang olgrokangaha aro chingnaba dakchakbeani ong⋅jok” ine taxi salgipa saksa aganaha.
“Car pass ba gari salrurana on⋅gipa lekkako private garirangna on⋅engon skatang manderangna on⋅ramramaigija, manderangko niroke on⋅a nanga, je dakode ia niamko darangba jakkalsretjawa” ine saksa taxi salgipa car pass ko on⋅ani giminba janapjolaha.
Skotong songjinma Shillongo, ramarang apchonani gimin odd-even niamko ra⋅gatosa ramarango gari salruraaniko komiatna man⋅aignok. Indioba nambate aro apalbate ramarangko tarina, bading-chiwalaniko aro a⋅dokna namroro-silroroaniko ra⋅bana ramarangko apalbate tarina nangchongmotengaha.
