Shillong, June 4: Odisha a·doko mija Sukrobar walo bolgittam rel garirang changsano a·sel ong·dimanichi komibeoba sak 288 manderangni janggi gimana gita nangaha aro hajal 1000 manderangna baten Balasore-ni Bahanaga Bazaar railway station-o ia dal·begipa obostako chagronge bilongbee jokkom ong·tokaha ine koborna parakataha.

Ia misilbegipa a·selni bidingo koborko man·sochengani gitade, Odisha-ni ning·ogipa Balasore district-ni Bahanaga Bazaar station-o donggipa dilgittam dingtang dingtang rel ramarangko re·enggipa Bengaluru-Howrah Superfast Express, Coromandel Express aro bostu salgipa rel gari bolgittaman ge·sa-ge·gipino chatinganichi dal·bee a·sel ong·aha ine parakataha.

Indake ong·engon, ia obosta ong·ani ja·man ru·utgijan sak 1000 mangna baten manderangko kamo donatenba a·sel ong·gipa biaponiko bilding-bildang ga·ake donggipa rel garini dringrangko ra·gale galani aro ramarangko taripilani kamrangkoba ka·chakataha ine gitalgipa koborko man·sodapaha.

Kamrangko nirokenggipa Railway Minister Pa Ashwini Vaishnaw, a·sel ong·ani ja·pangko ma·sina gita man·aha aro rel ramarangko Robibar salni gisepon chu·gimik taripilna man·naba donga ine koborna parakataha.

Unomiting, a·sel ong·ani salgipin Sonibar salo, a·songni Prime Minister Pa Narendra Modi, a·sel ong·gipa biapona re·ange nirokanga baksana hospital-rango done sana-bananiko on·enggipa jokkom ong·gipa manderangkoba grongangaha aro ia a·selona sokatanio dos donggipa manderangni kosako sinjetaniko on·na gita ka·dongatanikoba on·angjolaha.

Prime Minister-na agreba, gipin political-ni dilgiparang baksana West Bengal-ni skotong minister Ma Mamata Banerjee-ba a·sel ong·gipa biapona re·ange nirokanganio, 21-gipa chasongo rel garirangni dal·batgipa a·sel ong·ani ian skanggipa ong·gen ine aganangenba, a·doktangoni ia obostako chagronggipa nokdangrangna gong lak 5 tangkarangko gimaanina on·pilskana gita parakatjolaha.

Iakoba poraie nina man·gen: Garo Hills-na bol 10 PRIME Agri Response Vehicle-rangko CM a·bachengate on·anga