Shillong, Nov 11: Bijol sringanina bill gamkugijagipa gimik gadangni bijoli jakkalenggiparang (bijoli den·sotkamako man·gipa jakkalgiparangko man·chape), jemangan 2020, March 31 tarikona bijoli sringanina gamdatna nangani bang·en dongtokengachim, uamangna namgipa cholrangko on·na gita One Time Settlement (OST) Scheme, 2020-ko a·bachengataniko Meghalaya Power Distribution Corporation Limited (MePDCL) mijal Mongolbar salo parakataha.
Ia OTS Scheme-ni ning·o, jakkalgiparangna jean namgni dongbatenga uarangoni, DPC (Delayed Payment Charges)ko gamna nangjawaha ba bijolina gimik gamdatna nangenggipaoni 30% ko gamatgija watenganio nama cholrangko on·enga.
Department-oni u·iatani gita, ia scheme-ni namgipa cholrangko on·gimin somai gitasan man·aigen, jean 2020, November 1 tarikoni 2021, January 31 tarikona ong·a. Ia scheme-ni namgipa cholrangko dake ra·rikachi MePDCL-na uamangni gamna nangenggiparangko matchotatchina gitaba bijoli jakkalenggiparangko mol·molaha.
Iani gimin talbate ra·na gita, bijoli jakkalgiparang, biaptangtangni distribution sub-division-ni Assistant Executive Engineer (AEE)ko ba MeECL Headquarter, Lum Jingshai-ni OTS, Nodal Officer-ko gronge koborrangko ra·ena gita man·gen ba website www.meecl.nic.in -ko kullie talbate ra·naba man·gen.
