Patna, Nov 11: Gimik konta 14-rangna ru·utbee vote-rangko chananio, dikdiksani gisepon dingtanganiko nikrorona man·a baksana tang·ona-tang·doa dake susagrikanio jeon NDA aro Mahagathbandhan dolgnini baditaba changrang skangsoe donggrikaniko nikna man·ani ja·man, BJP-chi rikdilenggipa National Democratic Alliance (NDA) da·al pringo Bihar Assembly election-o chechotaha.
Election Commission-ni website-o parakatani gitade, BJP dol gimik 72 seat-rangko cheaha, indake skotong minister Pa Nitish Kumar-ni JDU dol mangmang 42 seat-rangkosan cheaiaha.
Indake ong·engon, warachakgipa dol RJD-ni Tejashwi Yadav-ni dilanichi ia eleksino bilake susagrikaha. Iano gisik nangataniara, vote pu·onani ja·man channa skang dingtang dingtang dolrangni bakrimgimin Grand Alliance (Mahagathbandhan)ni bang·a vote-rangchi chegniko mesoksoahachim. Gimik ge 75 seat-rango susaanganichi, RJD-an bang·batgipa dolsangipa ong·aiaha. Congress dol, jemangni a·selan warachakgipa dol eleksino ama cha·rikaha ine bang·an chanchienga, gimik ge 70 seat-rango susaanganio mangmang ge 19 seat-rangkosan chena chol ong·aha. Chirag Paswan-ni LJP, jean Nitish Kumar-ni suk ong·gijani ja·pang ong·achim, mangmang ge·sa seat-osan cheaiaha.
