By- Norahee Sangma
Re∙anggipa antirango an∙ching UDP dolrangni Power Minister Pa James Sangma ko Ministerni chaironiko ra∙galna dabianirangko aro uni kosako matnange agananirangko bang∙en kobor ra∙tmgiparangoniko niksona man∙aha. Indake dabianirangchi a∙doko songdongenggipa manderangna maming namgnikode ra∙baja indiba UDP dolni manderangnasan namgniko on∙aia, jedake re∙anggipa changoba uamang Home ministerni chairko Pa Sangmaoniko an∙tangni MLA Pa Lahkmen Rymbuina on∙skana man∙ahachim.
Home Department ian ge∙sa mongsongbatgipa jean a∙doko dingtangdingtang niam reti rangko tarigipa ba chalaigipa ong∙a. Da∙alo Pa Rymbui Home Departmentko chalaidilgenchim ong∙oba, re∙anggipa chango jedakgipa obostarangan a∙doko ong∙ahachm jeni giminan Pa Sangmako Ministerni chair oniko ra∙galahachim, apsandakgipa obostarangkon da∙aloba nikna man∙kuenga. A∙doko mande so∙otanirang, niam gri doka satanirang, rimsrukanirang, me∙chikrangni kosako drae til∙ekanirang batroroanirangko salantion niksona man∙enga.
Niatgenchimode an∙ching nikatna man∙gen jean re∙anggipa bilsini February jao Ichamatio dolgni jatni gisepo dakgrikanichi Khasi pante saksa siahachim, ua somoio je policerangan obosta ong∙anio dongpaachim ba nikachim, uamang mamingkoba ku∙watgija jrip jrip nitime donggiparangsan ong∙aiachim ine an∙ching sakantian ui∙na gita man∙a. Apsandakgipa obosta jean da∙omangmang Golflinko tom∙e dongenggipa manderangni saksa mandeko niam gri dokanichi South West Khasi Hillsni pante saksa sina gita nangahachim, ia ong∙gipa obostani kosako police dolrangni name sing∙sandianirangko dakjaani bidingo manderangni ka∙onanganirangkoba nikna gita man∙ahachim. Indake a∙doko songdongenggiparang jatsa jatgipan baksa mitchi-miknenggrikanirangko aro dakgrik su∙grikarangko salsabatroro niksona man∙enga. Uani bidingo dosi dakgiparangko tarake rim∙na gita sing∙sandianirangko dakna Home minister, Special Investigation Team (SIT) ko donatahachim, indiba uamangara kam ong∙ama? Batesa uamang uno jak donggiparangko rim∙na sing∙sandianirangko dakanio somoirangko ra∙engachim aro uamangni jinmana parakatanio gitade dos dakgipa dolrangara gipin jatrang ba non-tribalrang ong∙jachim, indide uamangara a∙doko songdongenggipa gipin Tribal jatrangko jaksi otengama? Ian aiao inmanpilgipa katta ong∙a.
Meghalaya a∙dok ge∙sa ‘Matrilineal Society’, jekon agangenchimode me∙chikrangan nokdangni gam jinko man∙rikgipa ong∙achim aro uani giminan a∙song gimiko mingsingako man∙achim. Indake ong∙genchimoba a∙doko me∙chikrangni kosako drae til∙ekanirangko aro so∙otanirangko salanti ong∙nasipile koborangoniko knasona gita man∙a. Ian an∙chingna namen kratcha∙beani ong∙a. Indakgipa obostarangoni mingsa, jean batanggimin bilsio, bilsi 16 ong∙gipa me∙tra saksako West Garo Hillsni a∙jao drae til∙ekahachim jekon da∙alona kingkingba dos dakgipa manderangko rim∙na gita man∙kuja. Maini gimin sing∙sandianirangko ta∙rake dakjaenga? Ma Garo jatrangde gamchatja? Ma me∙chikrangni aro bi∙sarangni naljoke donganide gamchatja? Indide me∙chikrang aro bi∙sarangara a∙palchi ong∙katgija mongsongbate walni somoirango noko kene nape dongaiboma? Uamangni a∙doko jakgitele donganiara baosa?
Ia indakgipa obostarangara UDP dolrangnade gamchatjama? Je uamang an∙tangni dolko Regional party, a∙dokni manderangna ka∙sagipa simsakgipa ong∙a ine a∙kange aganparakanirangko dakgipa ong∙achim. Indide mainasa uamangni dolni dilgiprangara an∙tangni dolni Ministerangko jean indake mongsonggipa chairko ra∙e dongengachim uamangkora sing∙doanirangko dakskajaenga? Maini gimin a∙doko ong∙enggipa obostarang jekai cha∙uanirang, so∙ot-dakgrikanirang, me∙chikrangni kosako ong∙gija dakanirangni bidingo, a∙doko niam retirangko taridilenggipa ba chalaienggipa Home Ministerni kosakode sing∙doanirangko dakjaenga? Ma Home Departmentko dilenggipa Ministerde doltangoni ong∙ani gimin mikgri ong∙tokahama? Na∙a saksa kakket bebe ong∙e a∙doko songdongenggipa manderangna ka∙sagenchimode indide maina da∙alona kingking jrip dongenga?
Re∙anggipa GHADC electiono UDP dolni dilgiparang Garo Hillsona wenbae, uamangni dolko seokgenchimode ba uamangna bilko on∙genchimode GHADC ko nambate chalaianggen ine ku∙rachaknirangkoba dakahachim, indiba an∙ching nikatna man∙a uamangni dolan A∙chik Minister ong∙anina mikbugiparang ba ra∙galgiparang ong∙achim jean an∙tang dolni Minister Pa Lahkmen Rymbui a∙dokko re∙dilgipa ong∙na krabatjachim maina ua a∙doko so∙sojengjeng ong∙anirangko tom∙tomatna aro nirok sandianirangko dakanio chu∙sokgipa ong∙na man∙jachim. Uni gimin hai an∙ching A∙chik jat sakantian indakgipa dolrangko, je rangan an∙tangni mandenasan chanchiaigipa ong∙a, uamangko mikkangchi seokjana. An∙ching sakantian sakgipinko an∙chingni bilko ra∙sekna man∙jana gita ku∙mong nangrime kam ka∙na.
