Guwahati, June 22: Pattoko donako man•enggipa Assam MLA Akhil Gogoi-ni 2019 bilsio Citizenship Amendment Act-ko jegale so•sojengjeng ong•atanio jak donganina bangki dongkuenggipa case minggnioniko mingsako Mongolbar salo, National Investigation Agency (NIA) Guwahati-ni kachario kema wataha.
Pattoko donako man•enggipa Akhil Gogoi, ia bilsini Assam Assembly election-o Sibasagar constituency-oni susae chegipa ong•ahachim aro uko dingtang dingtang case-rangna 2019 bilsini December jaonin pattoko donengachim.
Indake ong•engon, Unlawful Activities (Prevention) Act (UAPA)-o pangchake, manderangko ding•chaoatna jotton ka•anina Gogoi-ni kosako Chabua police station-o ka•gipa case-ko Mongolbar salo, NIA-ni kachari kema wataha.
Ia case-ni bidingo Gogoi-ko ia bilsini April jaon kema watahachim indiba uni kosako NIA badi ka•taiani ja•man bon•kame Mongolbar salo, ia case-ko kema wataha.
Gogoi-ni kosako IPC Section 120B, 124A, 153V aro UAPA-ni Section 18 aro 39-ni ning•o ka•gipa minggipin case-ba dongkuenga ine nikna man•a.
