Shillong, May 7: People’s Democratic Front (PDF)-ni MLA-rang, chong•motan Banteidor Lyngdoh aro Gavin M Mylliem Sonibar salo, National People’s Party (NPP) baksa bakrimeaha aro ia bakrimaniko NPP-ni national president aro Meghalaya a•dokni Chief Minister Conrad K Sangma, ‘bia ka•ani’ baksa tosusae aganangaha.
PDF-ni dilgiparangko NPP-ona rimchaksona gita Sonibar salo dingtangmancha tom•aniko Shillong songjinmao donggipa NPP headquarter-o ong•atangaha aro ia tom•anio a•dokni Chief Minister baksana, a•dokni Deputy Chief Minister Prestone Tynsong, sakgipin Deputy CM Sniawbhalang Dhar, Cabiner Minister Ampareen Lyngdoh, Cabinet Minister Comingone Ymbon, Cabinet Minister Marcuise N Marak aro NPP-ni gipin dilgiparangba bakko ra•angtokaha.
PDF-ni MLA-rangko NPP-ona rimchaksoangengon, NPP aro PDF dolrang, ru•uta sal somoirangna skangonin ‘mikchakgrikengachim’ indiba ia salo bia ka•aha ine Chief Minister parakataha.
PDF aro NPP dolni gisepo bakrimna gita ru•uta somoirangonin agangrikengachim indiba PDF-ni MLA sakgni, an•tangtangni manderangkoba rimbajolna chanchikuna gita somoirangko ra•kuaha aro uamang ong•akon dakaha ine Sangma parakataha.
PDF-ni bakrimna tarigimin lekkako uamang namen nimanaha aro uamangni dabianirangko chu•sokatna gita sorkari kamrangko ka•enga ineba Chief Minister parakataha.
Ia tom•anio NPP-ni vice president aro Deputy CM Prestone Tynsong-ba aganprakengon da•alo ia dolgnini songgigrikaniara ‘bia ka•ani’ gitasa ong•ahani gimin dolgnini gisepo bakrimani adita bilsirangnasan ong•aijawa indiba sia sijanakingking ong•anggen ine parakataha.
NPP baksa bakrimani bidingo PDF-ni MLA aro a•dokni gitcham sports minister Banteidor Lyngdoh-ba talataniko on•angengon, politics-ode ripeng ba bobil ong•kamani dongja ine parakatskaaha.
Ia salko ua bia ka•ani sal gita daknikpilaha ineba Lyngdoh aganaha.
NPP baksa bakrimaniara uamang an•tangtangni man•gnina ong•jawa indiba a•doko songdongenggipa manderangni namgninasa ong•gen ineba PDF MLA parakataha.
Ia tom•anio PDF-ni president aro Sohra-ni MLA Gavin Mylliem-ba jinmana aganprakengon, Chief Minister Conrad K Sangma-ni dilanichi MDA sorkarini rake kamko ka•ani a•selsa uamang, Chief Minister-ni dilanichi nambata Meghalaya-ko ong•atna da•alo NPP baksa bakrimeaha ine parakataha.
Iakoba poraie nina man·gen: MBOSE, Science, Commerce & Vocational -ni HSSLC result-ko May 9-o parakatnasia
