Shillong, Feb 17: A·doko Jal Jeevan Mission-ni kamrangko ba nokantina chirangko sale on·aniko gong·raken matchotatna miksongenganio PHE department-o sak 45 junior engineer-rangko kamo rakkiangna da·al Butbar salo Meghalaya cabinet ra·chakaha.
“Ia sak 45 Junior Engineer-rangko, MPSC (Limitation of Functions) Regularisations, 1972-ni Regulation 3(f)ni ning·o Grade I (Civil)o pangchake kamo rakkianggen,” ine cabinet-ni tom·a matchota ja·man da·al Butbaro skotong minister Pa Conrad K Sangma koborna parakataha.
“Ian, Meghalaya-o Jal Jeevan Mission-ni pilak kamrangko re·baenggipa bilsi-gittamni gisepon matchotatna nisanko dongimin donganio, kamrangko ka·na gita mande chu·onge dongjani a·selo kam ka·giparangko gong·raken nangdapengani gimin ong·a,” ine Pa Sangma agan-talataha.
Iana agreba, da·al salni bakon Meghalaya Fiscal Responsibility and Budget Management Act, 2006-ko namdapatanikoba cabinet ra·chakangjolaha.
“A·gilsak gimikchina gipgipa sajinmani a·sel tangka-paisao neng·nikaniko man·ani gimin sorkarirangna, 2 percent-ko ra·sochengchina gita India sorkari chol on·aha, uno pangchake FRBM Act-ko namdapatna nangao ga·akaha aro chu·gimik GDP-ni 5 percent-ko (a·bachengo 3 percent-ko on·achim) a·dok sorkarina gro dake ra·sochengna on·ani gimin Act-ko namdapatna niam donakoba ra·chakangaha,” ineba skotong minister parakataha.
