Shillong, Sept 7: HNLC bobil dolni gitcham dilgipa Cheristerfield Thangkhiew-ko so•ote galanio jak donggipa police officer-rangko kam dontongatchina dabitokengon, ia police officer-rangko kam ra•galningjaengani gimin ‘Sur ki Nong Mawlai’ ba Mawlai-o songdongenggiparangni ku•rang dolni dilgiparang aro jolni MLA PT Sawkmie-ba sorkarini kamo suk ong•gijaniko paraktokaha.
HNLC-ni gitcham dilgipako so•ote galaniara namen kragijani ong•aha ine Governor-ni agangipa kattarangna mittelpilaniko parakatengon, manderangni nangnikaniko ma•sichake kakket bichalko ra•bachina gita Sawkmie, a•dokni Chief Minister Conrad K Sangma-ko didiataha.
“Sorkariko aro an•tang baksa kam ka•rimskarangko kratcha•atjachina anga CM-ko didienga. Da•o ong•na sienggipa Assembly-ni Autumn Session-oba Cheristerfield-ko so•ote galgipa giminan jera ra•grikna sienga,” ine Sawkmie aganaha.
‘Sur ki Nong Mawlai’ dolna chakpaaniko parakatengon, ia a•selni giminan manderang ding•chaotokengani gimin police officer-rangko kam ra•galchina ua a•dokni CM-ko didiataha.
Indake ong•engon, HNLC-ni gitcham dilgipako so•ote galanio jak donggipa police officer-rangko kam dontongatchina dabianiko knachakjaengani gimin ‘Sur ki Nong Mawlai’ dolni dilgipa Marbud Dkhar-ba a•dok sorkariko sing•doangaha.
Ia a•selko a•dokni Governor an•tangan jegalatahaoba maini gimin ia police officer-rangko kam ra•galkujaenga ineba ua sing•doangaha.
HNLC-ni gitcham dilgipa Cheristerfield Thangkhiew-ko so•ote galani gimin jegale aro uni nokdangna kakket bichalko on•china dabie Mongolbar salo Malki-oba jinma tom•bimonganiko ong•atangahachim.
Indake ong•engon, Mawlai-o songdongenggiparangni ku•rang dolni dabie segipa chittio ua soi ka•jawa ine koborrangko on•ani ja•man, Cabinet minister Renikton Tongkhar-ko Mawlai jolo songdongenggipa manderang aro ia dolni dilgiparang, raken jegalatskaaha.
Cheristerfield-ko so•otanio jak donggipa police officer-rang, chong•motan East Jaintia Hills aro East Khasi Hills a•jani SP baksana SP Traffic-ko kam ra•galchina dabie segipa chittio soi ka•china gita didie, ia ‘Sur ki Nong Mawlai’ dolni dilgiparang, Khasi aro Jaintia Hills a•jani sak 35 MLA-rangko grongengachim.
Indake ong•genchimoba, an•tangni kosako matnanganirangna Tongkhar talataniko on•angskaaha aro ua soi ka•na jechaka ong•jachim indiba MDA-o bakrimskarang baksa agangrikchengnasa aganachim ine parakataha.
Ia a•selni bidingo judicial inquiry-ko sorkari nama bewalon matchotatna jotton ka•enga ineba ua manderangko sorkario bebera•china aro inquiry matchotako sengkuchina gita didiataha.
