Guwahati, Dec 28: Police-rangni salanti sing·sandie roanichi sasti on·ani a·selsa Dipankar Gogoi, an·tangko so·ote sina draatako man·aha ine sianggipa Dipankar Gogoi-ni nokdang, Assam police-rangko matnangaha.
Sianggipa Dipankar Gogoi-ni pagipa Khagen Gogoi-ni kobor ra·timgiparangna parakatani gitade, Jorhat-o grenade bomako gopretanio uni depante Dipankar-de jak dongjachim indiba ia a·sel ong·ani ja·man Dipankar-ko salantian police station-ona rimange, sing·sandie roahani a·selsa ua gisikni gita dongtogijaniko man·e an·tangko so·ote sina draatako man·ahachim.
“Jorhat-o grenade boma gopretani somoio angni depante nokon donge bijak song·engachim aro ua maming dakeba boma gopretanio jak dongjachim. Indiba police-rang salantian uko police station-ona rimange, uko ia a·selo dos dongdrakatna gita sing·sandie roahani a·selsa ua gisikni gita dongtogijaniko man·e an·tangko so·ote siaona sokaha,” ine Khagen Gogoi aganaha.
Gogoi-ni aganani gitade, batanggimin antigimikan Dipankar-ko Titabor police station-ona rimange police-rang, salgimik gimik sing·sandie rorongaha aro walosa uko watpilatrongachim. Sing·sandiengmiting somoio police-rang uko doke sateba roahachim ineba Gogoi aganaha.
Ia a·selni bidingo Jorhat-ni superintendent of police (SP) Mohan Lal Meena, talataniko on·angskaengon, Dipankar Gogoi aro Sivsagar-ni Pallav Jyoti Gogoi minggipa chadambe saksa, 2019 bilsio ULFA-I bobil dolo napahachim indiba uamangko Assam Rifles-ni sipairang, Arunachal Pradesh a·doko rim·e adita salrangna pattoko donaha ine parakataha.
“Jorhat-o boma gopretgipani bidingo sing·sandina gita chinga Dipankar-ko Titabor police station-ona okamataha aro ukosan ong·aigja chinga ULFA-I bobil dolni bame on·gimin bang·bata manderangkon sing·sandina okamataha. Chinga uamangko CCTV-ni ning·osa sing·sandiaha aro chingni sing·sandiani a·sel ua an·tangko so·ote siaha ine matnanganiara kakket ong·ja,” ine Jorhat SP aganskaaha.
Indake ong·engon, bilsi 24 ong·gipa Dipankar Gogoi-ni so·ote siani bidingo high level inquiry-ko dakchina gita Assam a·dokni Chief Minister Himanta Biswa Sarma ge·etaniko on·ataha.
Iakoba poraie nina man·gen: Git ring•anio mingsingbegipa Sanam Puri, Nagaland-oni Zuchoben Tungoe baksa bia ka•nasia
WATCH:
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
