Shillong, May 17: Upper Shillong-ni Bio Resource Development Centre (BRDC)-o ong•atenggipa Potato Seed Production Program-ko Budbar salo, Meghalaya a•dokni Chief Minister Conrad K Sangma, a•dokni Agriculture Minister Ampareen Lyngdoh baksa nieaha.
Ia project-ara, a•doko alu ge•e man•aniko bariatna aro dingtang dingtang rokomni alurangko salgro salaramni gipin a•dokrang baksana gipin biaprangonaba palatskana gita a•dok sorkarini a•bachengatgipa project ong•achim aro ia project-ko International Potato Centre (ICP), Meghalaya Basin Management Authority, Horticulture Department aro Shimla-o donggipa Central Potato Research Institute, jako ra•e ka•enga.
Ia Potato Seed Production Program-ni bidingo a•dokni Chief Minister Conrad K Sangma talataniko on•angengon, namgipa aro bite nangninggipa alurangko ge•e man•na gita science-ni bewalo gama ge•ani cholko a•bachengataha aro ia project-chi a•dok sorkari, gitcham chasong aro gital chasongni alurangni dingtanggrikaniko mesokna gita game ge•e cha•enggipa manderang baksa nangrime kamko ka•enga ine parakataha.
Ia pilot project da•o dipet namen chu•sokgipa ong•aha aro mikkangchi alu ge•e cha•giparangni man•gniko changgni bariatna gita sorkari dingtangmancha cholko a•bachengatna miksongenga ineba Chief Minister parakataha.
Upper Shillong-o donggipa Kyrdemkulai Integrated Village Cooperative Society (IVCS)-koba ja•mano Chief Minister niangaha aro uano game ge•e cha•enggipa manderang baksaba agangrikangaha.
