Shillong, Dec 8: Power department-ni mongsonggipa minggittam kamrang, chong·motan Smart metre-rangko chatani, Mawlai sub-station-ko dal·batatani aro Ganol Mini Hydro Project-ni kamrangko Budbar salo, Meghalaya a·dokni Power Minister Prestone Tynsong nipilangaha.
Power department-ni official-rang baksa tom·a matchotani ja·mano kobor ra·timgipa manderang baksa agangrikengon, power department-o gong kror 2000-na bate grorang donge da·o bilsi 10-ni ja·man ia grorang tang·dororoangaha indiba da·o ia grorangko a·dok sorkari, jaanti chotenba komiatna jotton ka·enga ine parakataha.
Ia grorangara skangonin ong·bagipa grorangsa ong·achim ine talatangengon, Power department aro Meghalaya Energy Corporation Limited (MeECL)-ni grorangko MDA sorkari chotna jotton ka·enga ine Tynsong parakataha.
Atma Nirbhar Scheme-ni ning·o India sorkari, ia grorangko chotna dakchakengama ine sing·on, ia scheme-de NTCP aro NEEPCO gita dakgipa company-rangoniko bijoli breani grorangko chotna on·gipasa ong·a ine Power Minister talataniko on·angaha.
Sin·karini somoirangosa chirang komiani a·sel bijolirangko somoi gita kimitna nangronga ine talataniko on·angengon, mikkang jarango a·doko load shedding-ko ka·na nangjana gita MeECL aro Power department apsan kamko ka·gen ine Tynsong parakataha.
Ganol Small Hydro Project-ni gimin janapangskaengon, ia gong kror 507.71-ni 21.5 MW Ganol Small Hydro Project-ko 2022 bilsini September jaonide a·bachengatna gita sorkari nisanko donmanaha ine Tynsong parakataha. Tynsong-ni parakatani gitade, ia project-na a·bachengo chamgipa gong kror 350 korosko gong kror 507.71-ona ra·doatahachim.
