Shillong, Aug 4: Politics-ni kamko ka•anio ja•delbatgiparangoni saksa Prof Malcolm Tariang, Bristibar salo, an•tangna kam ka•gipa manderang baksa National People’s Party (NPP)-o napangaha aro uko NPP-ni national president Conrad K Sangma aro NPP-ni national vice president Prestone Tynsong rimchaksoaha.
Prof Tariang-ko NPP-ona rimchaksoanio NPP-ni national president aro Meghalaya a•dokni Chief Minister Conrad K Sangma, jinmana aganprakangengon, uni NPP-o napaniara NPP-na man•dapani ong•gnok maina ua saksa dilna changgipa mande ong•e NPP-ko bilakbatatna dakchakani ong•gen ine parakangaha.
Prof Tariang gita dakgipa mandeni NPP-o napaniara gipinrangnaba dakmesokani gita ong•gen ineba Sangma aganaha.
NPP dolara nokdang ge•sa gita ong•a, jeon dolni manderang, miksongani gnang ku•cholsan nangrime kamko ka•enga ineba NPP-ni national president parakataha.
