Tura, April 12: GHADC-na Sombar salo pu·onatani somoio, pu·onchakgipa biapni a·palo manderangoniko vote bi·amna jotton ka·ani a·sel saksa BJP dolna kam ka·gipako gipin dolrangna chakgiparang bilongbee doktimolaha aro ia obostara attamchibara bang·a manderangni uko rim·china gita Dalu police station-ko changduule dabiani somoio bate namjabatangaha.
Ia obostara Chaipani polling station-o ong·aha jeon saksa BJP dolni dilgipa aro ua jolo RSS-na kam ka·enggipa ine agangipa Anoy Paul minggipa, dolna chakpagiparang baksa ua somoio pu·onna re·bagipa manderangoniko vote-rangko bi·amna jotton ka·tokahachim jenan bang·a manderang uamangni kamko namnikjae ja·mano gipin dolna kam ka·giparangna aro mande jinmana aganetokaha.
Indake dakanichi BJP dolna kam ka·giparang baksa adita kajia nanggrikaona sokaha aro ja·mano manderangni jakchi ua dokgrima cha·aha.
An·tangko doka-satani gimin mamla segatna gita bakan Dalu police station-china re·angani a·sel obostarang ja·mano batesa namjabatna gita a·bachengaha jeon uko ka·a ding·e donggipa manderang ua somoio police station-ko changduulenba niam gri dake manderangoniko vote bi·amani gimin aro pu·onani somoio golmalko ong·katatani gimin uko rim·china gita dabitokaha.
Obostarangni namroroangjaniko ma·sisoe, mamlako tom·tomatna gita chelchakgipa sipai dolrangko rimdapangeming a·jani Deputy commissioner Pa Ram Singh baksana district-ni SP Dr MG Raghavendra Kumar-maang bakan Tura songjinmaoni km 51 mang chel·gipa Dalu-china re·gitikangaha.
