Tura, June 26: Rabha manderangni janggi tangani gadangko ra•dona gita sorkari, dingtangmancha dakchakaniko on•gen ine Robibar salo, Meghalaya a•dokni Chief Minister Conrad K Sangma, ku•rachakaniko on•angaha.
Meghalaya a•doko donggipa All Rabha Students Union (ARSU)-ni changchetgipa Biennial Conference aro brigipa Baiko Dera Festival-ko North Garo Hills a•jani Manikganj songo ong•atanio a•dokni Chief Minister bakko ra•e jinmana aganprakangengon, Rabha-rangko tang•doatna gita ia manianiko ong•atahani gimin ua dingtangmancha ARSU-ko mittelpilangaha.
Jatni daka rikani aro man•rikaniranga namen gamchatbegipa ong•a aro technology-ko a•bachengatanian songsalko dingtangataha ine janapatengon, manderang jattangni ong•baaniko name ma•sigiparang ong•na nanga aro jattangni namgnina an•tangtangni daka rikanirangko ripinge rakkina nanga ine Chief Minister parakataha.
Tribal me•chikrangoni saksa Droupadi Murmu-ko bakan a•songni President songna siengahani gimin ian India a•songo songdongenggipa Tribal manderangna namen rasong chaani somoi ong•na siengaha ineba Sangma aganaha.
Uni pagipa PA Sangma sagiba 2012 bilsio president-ni kamna susaahachim ine gisik ra•atpilaniko on•angengon, ia election-o ua chegipa ong•jahaoba, Tribal jatrangba a•songni dal•batsranggipa gadango ong•na man•aia ine manderangna mesokangaha ine Chief Minister parakataha.
Ia tom•aniko ong•atanio Assembly-ni Deputy Speaker Timothy D Shira, Mendipathar MLA Marthon Sangma, Kharkutta MLA Rupert Momin aro gipin dilgiparangba dongpae bak ra•angaha.
